ព័ត៌មានReuters ផ្សាយថ្ងៃទី១៣ខែកញ្ញា គឺមួយថ្ងៃក្រោយពេលដែលទីប្រឹក្សាសេដ្ឋកិច្ចសេតវិមានប្រកាសពីការដែលរដ្ឋការអាមេរិកបានស្នើឱ្យចិនធ្វើការជួបចរចាឡើងវិញ។ ប្រធានាធិបតីអាមេរិក Donald Trump ប្រកាសថា ក្រុងWashington មិនរងសម្ពាធណាមួយដើម្បីឈានទៅរកកិច្ចព្រមព្រៀងពាណិជ្ជកម្មណាមួយជាមួយក្រុងប៉េកាំងឡើយ។
លោកTrump សរសេរលើបណ្ដាញសង្គម Twitter ថា៖«យើងខ្ញុំពុំរងទទួលសម្ពាធណាមួយទាំងអស់ដើម្បីទទួលបានកិច្ចព្រមព្រៀងជាមួយចិន។ពួកគេទើបរងទទួលសម្ពាធត្រូវចរចា ជាមួយយើងខ្ញុំ។ ណ្ដាទីផ្សាររបស់យើងខ្ញុំសុទ្ធសឹងកំពុងមានកំណើនខ្ពស់ក្នុងពេលដែលទីផ្សាររបស់ពួកគេកំពុងដួលរលំ។យើងខ្ញុំនឹងទទួលបានរាប់ពាន់លានដុល្លារដែលជាប្រាក់ពន្ធនិងផលិតកម្មក្នុងស្រុក។
តាមការស្ទាបស្ទង់របស់សម្ព័ន្ធសមាគមពាណិជ្ជកម្មនៅចិន ដែលបានដំណើរការពីថ្ងៃទី២៩ខែសីហាដល់ថ្ងៃទី៥ខែកញ្ញា ចំពោះក្រុមហ៊ុនជាង៤៥០របស់អាមេរិកកំពុងរកស៊ីនៅប្រទេសចិនថា ពួកគេបានរងឥទ្ធិពលខ្លាំងក្រោយផ្ទុះឡើងភាពតានតឹងពាណិជ្ជកម្មរវាងប្រទេសទាំងពីរ។មានក្រុមហ៊ុនប្រមាណ៦០ភាគរយឱ្យដឹងថា ប្រាក់ចំណេញនិងតម្រូវការរបស់អតិថិជនថយចុះ ព្រោះតែប្រទេសទាំងពីរដំឡើងពន្ធទៅវិញទៅមក។
ទន្ទឹមនោះមានក្រុមហ៊ុនប្រមាណ៧៤,៣ភាគរយនិយាយថា ពួកគេនឹងរងឥទ្ធិពលប្រសិនបើអាមេរិកបន្តអនុវត្តន៍គិតពន្ធចំពោះទំនិញចិនដែលមានតម្លៃ២០០.០០០លានដុល្លារនោះ។ ក្រុមហ៊ុនប្រមាណ៦៧,៦ភាគរយបង្ហាញថាពួកគេពុំមានគំនិតសុទិដ្ឋិនិយមឡើយប្រសិនបើចិនធ្វើការដំឡើងពន្ធចំពោះ ទំនិញអាមេរិកដែលមានតម្លៃ៦០.០០០លានដុល្លារនោះ។
៥២ភាគរយនៃក្រុមហ៊ុនខាងលើឱ្យដឹងថា រដ្ឋការក្រុងប៉េកាំង«កំពុងបង្កការលំបាក»ដល់ពួកគេ តាមរយៈការធ្វើបែបបទនាំចូលយឺតយ៉ាវ អធិការកិច្ចយ៉ាងតានតឹង ហើយទង្វើរដ្ឋបាលបែបនាហ្មឺននិយម។
សប្តាហ៍កន្លងមក លោកTrump ព្រមានថានឹងធ្វើការវាយពន្ធលើទំនិញចិនដែលមានតម្លៃ២០០.០០០លានដុល្លារក្នុងពេលឆាប់ៗខាងមុខ។
ប្រឈមមុខនឹងសភាពការណ៍នេះ បណ្ដាក្រុមហ៊ុនអាមរិកនៅចិនកំពុងថ្លឹងថ្លែងគ្រោងការណ៍ចាកចេញពីប្រទេសនេះ ទៅកាន់ប្រទេសដទៃទៀតនៅទ្វីបអាស៊ី។
ជាក់ស្ដែងមានក្រុមហ៊ុនប្រមាណ៣០ភាគរយក្នុងចំណោមនោះកំពុងដំណើរការបញ្ជូនសេវាកម្មរបស់ខ្លួនចេញផុតពីប្រទេសចិន ហើយក្រុមហ៊ុនដែលត្រៀមធ្វើការវិនិយោគក្នុងសមាមាត្រប្រហែលគ្នានោះក៏បានលុបចោលគ្រោងការណ៍របស់ខ្លួន។ដោយឡែកក្រុមហ៊ុនមកពីអឺរ៉ុបប្រមាណ១៧ភាគរយក្នុងចំណោមក្រុមហ៊ុនជិត២០០ ក៏បានលុបចោលគ្រោងការណ៍វិនិយោគបន្ថែមពង្រីកមុខរបរ៕
លីសា
