នេះជាហេតុការណ៍ដ៏ញាក់សាច់មួយ ខណៈដែលប៉ូលីសចរាចរណ៍ បើកម៉ូតូប្រដេញតាមរថយន្ត១គ្រឿងបើកបរដោយស្ត្រីស្រវឹងម្នាក់ ដែលព្យាយាមបើកគេចយ៉ាងសាហាវ ទាំងរថយន្តគ្មានសំបកកង់មុខ ស្ថិតនៅតាមបណ្តោយផ្លូវមួយកន្លែងនៅក្នុងទីក្រុងមូស្គូ ប្រទេសរុស្ស៊ី កាលពីពេលថ្មីៗនេះ ។
យោងតាមប្រភពព័ត៌មាន បានឲ្យដឹងថា នៅពេលប៉ូលីសព្យាយាមបញ្ឈប់ស្ត្រីនោះ ដើម្បីត្រួតពិនិត្យឯកសារមួយចំនួន ប៉ុន្តែ នាងពុំអើពើនឹងសំណើរសុំរបស់ពួកគេនោះទេ ហេតុនេះ ការប្រដេញតាមក៏បានចាប់ផ្តើមតែម្តង ។
នៅចំណុចមួយ ស្ត្រីបើកល្មើសរូបនោះ បានបើករថយន្តប៉ះទង្គិចជាមួយរថយន្តមួយគ្រឿង ក្នុងចំណោមរថយន្តជាច្រើននៅលើដងផ្លូវ និងបន្ទាប់មក ក៏បានព្យាយាមបើករត់រហូតជ្រុះសំបកកង់មុខផ្នែកខាងឆ្វេងតែម្តង ។ ប៉ុន្តែ នៅទីបំផុត ស្ត្រីរូបនោះដោយសារតែគ្រប់គ្រងការបើកទៅមុខទៀតលែងរួច ក៏បានបើកចូលអែបនឹងរបងផ្លូវ ។
ភ្លាមៗនោះ ប៉ូលីសក៏បានប្រញាប់ប្រញាល់ចូលទៅបើកទ្វារ និងនាំយកស្ត្រីនោះចេញពីក្នុងរថយន្ត ដែលបង្ហាញជាមួយស្ថានភាពដៃញ័រទទ្រើក និងទប់ខ្លួនពុំនឹងនរនោះទេ ។ បន្ទាប់មក ស្ត្រីនេះត្រូវបានធ្វើតេស្ត និងរកឃើញប្រើប្រាស់សារជាតិស្រវឹងនៅក្នុងខ្លួន ។
យោងតាមរបាយការណ៍ប៉ូលីស ពុំមាននរណាម្នាក់រងរបួសនៅក្នុងប្រតិបត្តិការតាមប្រដេញចាប់រថយន្តនេះទេ ប៉ុន្តែ ផ្នែកខាងមុខរថយន្តរបស់ស្ត្រីនោះខូចខាតទាំងស្រុង និងបាត់បង់សំបកកង់មុខផ្នែកឆ្វេង ៕ ឧត្តម (life.ru)
