នេះជារឿងដ៏ចម្លែកបំផុតមួយ ដែលត្រូវបានចាត់ទុកថាគ្មានពីរទេនៅលើពិភពលោក ដោយសារតែកូនក្រមុំម្នាក់ កំពុងតែក្រាបសំពះផ្ទឹមក្នុងថ្ងៃមង្គលការរបស់ខ្លួន ស្រាប់តែឈឺពោះ ធ្វើឲ្យគ្រួសារ សាច់ញាតិ ព្រមទាំងភ្ញៀវទៅចូលរួមមង្គលដែលមានការភ្ញាក់ផ្អើល ប្រញាប់ប្រញាល់ដឹកកូនក្រមុំទៅសម្រាលនៅមន្ទីរពេទ្យភ្លាមៗតែម្តង ។
រឿងហេតុដ៏កម្រនេះ ដែលបានកើតឡើងកាលពីថ្ងៃទី១៤ ខែកញ្ញា ឆ្នាំ ២០១៨ នៅឃុំ ព្រែកអំបិល ស្រុក ស្អាង ខេត្ត កណ្តាល ត្រូវបានមហាជនជាច្រើនសន្មត់ថា កូនក្រមុំ និងកូនកំលោះ បានស្រលាញ់គ្នា និងជ្រុលជ្រួសហួសប្រពៃណី ដែលអាចប្រព្រឹត្តមុន ឬ ក្រោយពេលលោកអាចារ្យគុនគូរជើងលេខថ្ងៃចូលរោង ។ ប៉ុន្តែ ដោយសារតែពួកគេពុំអាចគ្រប់គ្រងការមានគភ៌បាន ជាហេតុធ្វើឲ្យខាងស្រីត្រូវមានផ្ទៃពោះរហូតដល់ជាង ៨ ខែ ដល់ថ្ងៃកំណត់ចូលរោងតែម្តង ។
ដោយសារតែប្រហែលពុំអាចលើកពេលរៀបការបាន ហេតុនេះ ឪពុកម្តាយទាំងសងខាង ក៏សម្រេចចិត្តរៀបមង្គលការឲ្យពួកគេ ខណៈកូនក្រមុំមានផ្ទៃពោះជិតគ្រប់ខែទៅហើយ ។ ប៉ុន្តែ ពុំនឹកស្មានថា នាងឈឺពោះសម្រាលកូនក្នុងថ្ងៃមង្គលរបស់នាងបង្កការភ្ញាក់ផ្អើលយ៉ាងនេះនោះទេ ។
ទោះយ៉ាងណា កូនក្រមុំ ក៏ត្រូវបានអ្នកគ្រូពេទ្យអនុញ្ញាតឲ្យទៅចូលរួមកំដរភ្ញៀវ នៅថ្ងៃរសៀល តាមដែលអាចធ្វើទៅបាន បន្ទាប់ពីសម្រាកឲ្យមានកម្លាំងកំហែងនៅក្នុងមន្ទីរពេទ្យ ។
សូមបញ្ជាក់ថា កូនក្រមុំឈ្មោះ ម៉ាច ខ្លី អាយុ ២១ ឆ្នាំ រីឯកូនកំលោះឈ្មោះ ខាន់ មករា អាយុ ២០ ឆ្នាំ និងកូនង៉ែតរបស់ពួកគេ ត្រូវបានក្រុមអ្នកគ្រូពេទ្យដាក់ឈ្មោះឲ្យថា «ស្រីកា»៕ ឧត្តម (ប្រភពហ្វេសប៊ុក៖ សាន ប៊ុនធឿន)
