រាជធានីភ្នំពេញ ៖ អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន NACD បានផ្សព្វផ្សាយថា នៅថ្ងៃទី១៤ ខែកញ្ញា ឆ្នាំ២០១៨ លោក នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន និងជាអនុប្រធានអចិន្ត្រៃយ៍លេខាធិការដ្ឋានប្រយុទ្ធប្រឆាំងគ្រឿងញៀនខុសច្បាប់ បានផ្តល់បាឋកថា ក្នុងវគ្គបណ្តុះបណ្តាល តាមឋានានុក្រមដឹកនាំកម្រឹត២ បណ្ឌិត្យសភានគរបាលកម្ពុជា ដែលមានអ្នកចូលរួម៥០នាក់។
ក្នុងឱកាសនោះ លោក នាយឧត្តមសេនីយ៍ មាស វិរិទ្ធ បានថ្លែងថា មន្ត្រីនគរបាលជាតិទាំងអស់ គឺជាកូនចៅប្រជាពលរដ្ឋ ដូចនេះត្រូវតែយកចំណេះដឹង ដែលទទួលបានទៅបម្រើប្រជាពលរដ្ឋ ដោយស្មោះត្រង់ គោរពក្រមសីលធម៌ វិជ្ជាជីវៈ ជាមន្រី្តនគរបាលជាតិ បម្រើជាតិប្រជាពលរដ្ឋ ដោយស្មោះត្រង់។
ក្នុងឱកាសនោះដែរ លោក នាយឧត្តមសេនីយ៍ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា បញ្ហាគ្រឿងញៀនលើសកលលោក មិនមានសញ្ញាថមថយទេ នាំឲ្យជះឥទ្ធិពលមកដល់កម្ពុជា ឆ្លើយតបនឹងបញ្ហាគ្រឿងញៀន សមត្ថកិច្ចពាក់ព័ន្ធគ្រប់លំដាប់ថ្នាក់ ខិតខំធ្វើការផ្សព្វផ្សាយ ដល់ប្រជាពលរដ្ឋ ឲ្យមានការយល់ដឹងនិងចូលរួមជាមួយសមត្ថកិច្ច ក្នុងការបង្ការទប់ស្កាត់ ព្យាបាល ស្តារនីតិសម្បទា និងបង្ក្រាបជនល្មើសជួញដូរគ្រឿងញៀន៕ ដោយ ៖ បញ្ញាស័ក្តិ
