ប្រធានគណៈកម្មការទីផ្សារហិរញ្ញវត្ថុនៃរដ្ឋសភារុស្ស៊ី Anatoly Aksakov ប្រកាសគាំទ្រផែនការផ្អាកទាំងស្រុងការ ប្រើប្រាស់រូបិយប័ណ្ណUSD ហើយប្រសិនបើទទួលបានការអនុញ្ញាតគេនឹងអាចធ្វើរួចរាល់ក្នុងអំឡុងពេលពី៣ទៅ៥ឆ្នាំ។
តាម RT នៅថ្ងៃទី១៥កញ្ញា ដែលដកស្រង់សម្តីលោកAnatoly Aksakov បានវាយតម្លៃថា នេះជាផែនការអាចអនុវត្តន៍បាន ហើយនឹងជួយដល់ប្រព័ន្ធហិរញ្ញវត្ថុរុស្ស៊ីបញ្ចៀសបានហានិភ័យដោយសារឥទ្ធិពលពីខាងក្រៅ។ មុននោះប្រធានធនាគារ VTB Andrey Kostin ក៏បានសំណើបោះបង់ចោលUSD ចេញផុតពីទីផ្សារជំនួញនៅរុស្ស៊ី។
ក្នុងវេទិកាសេដ្ឋកិច្ចប៉ែកបូព៌ានៅទីក្រុងVladivostok កាលពីដើមសប្តាហ៍កន្លងមក ប្រធានាធិបតី Vladimir Putin ក៏បានសន្និដ្ឋានថាUSD គឺជា«ទ្រព្យសម្បត្តិបង្កប់នូវហានិភ័យច្រើន»ព្រោះតែបំណុលបរទេសរបស់អាមេរិកបច្ចុប្បន្នគឺ 20.000ពាន់លានដុល្លារ។
តាមReuters នោះរុស្ស៊ីកំពុងមាននិន្នាការកាត់បន្ថយការប្រើប្រាស់រូបបិយប័ណ្ណដុល្លារក្នុងជំនួញអន្តរជាតិ ហើយជំនួសដោយរូបិយប័ណ្ណរបស់បណ្ដាប្រទេសដែលធ្វើជំនួញជាមួយគ្នា៕
លីសា
