នៅថ្ងៃទី១៦កញ្ញា កាសែតWall Street Journalបានដកស្រង់សម្ដីមន្ដ្រីចិនឱ្យដឹងថារដ្ឋាភិបាលចិនអាចនឹងមិនចូលរួមក្នុងកិច្ចចរចាពាណិជ្ជកម្មថ្មីជាមួយអាមេរិក ដែលតាមគម្រោងនឹងប្រព្រឹត្តនៅចុងខែនេះប្រសិនបើរដ្ឋាភិបាលអាមេរិកនៅតែបន្តការវាយពន្ធបន្ថែមចំពោះមុខទំនិញទាំងឡាយរបស់ចិនក្នុងសប្តាហ៍នេះ។
ប្រភពព័ត៌មានខាងលើអះអាងថា ចិននឹងមិនចរចាក្នុងស្ថានភាព«ចុងកាណុងភ្ជង់ចំក្បាលខ្លួន»ព្រោះអាមេរិកបានប៉ង ដំណើរការផែនការដំឡើងពន្ធបន្ថែមលើមុខទំនិញមានតម្លៃ២០០ពាន់លានដុល្លារ ទន្ទឹមនឹងការដែលអញ្ជើញចិនឱ្យចរចាជាមួយខ្លួន។
ប្រភពដដែលឱ្យដឹងបន្ថែមថា មន្ត្រីរបស់ចិនមួយចំនួនបានផ្ដើមសំណើដល់មេដឹកនាំប្រទេសនេះធ្វើការកំណត់កូតាចំពោះ បណ្ដាបរិក្ខារមុខទំនិញដែលក្រុមហ៊ុនអាមេរិកត្រូវការដើម្បីគំរាមកំហែងដល់ចរន្តផ្គត់ផ្គង់របស់ក្រុមហ៊ុនអាមេរិក។
មុននោះរដ្ឋមន្ត្រីហិរញ្ញវត្ថុអាមេរិកSteven Mnuchinបានស្នើសុំឱ្យមានកិច្ចចរចាពាណិជ្ជកម្មជាមួយនឹងចិន៕
លីសា
