ក្មេងប្រុសអាយុ ៣ឆ្នាំនេះ នៅមានជីវិត ទោះបីជា ៥ថ្ងៃកន្លងហើយ ដែលវាផឹកតែទឹកម៉ាស៊ីន ក្រោយពេលជីតាបានស្លាប់ចោល ។ រឿងនេះកើតឡើងនៅភាគខាងត្បូងប្រទេសចិន ។
នាង Wei Jingvu និងក្មេងប្រុសអាយុ ៣ឆ្នាំ ។
ក្មេងប្រុសនេះត្រូវបានសាច់ញាតិប្រទះឃើញពេលវាដេកសន្លប់ក្បែរសាកសពជីតាឈ្មោះ Wei Ximing អាយុ ៦៦ឆ្នាំ នៅភូមិ១ នាស្រុកវ៉ាន់ឡាំង ខេត្តក្វាងស៊ី ប្រទេសចិន ។
Wei Jingvu ដែលជាសាច់ញាតិរបស់លោក Wei ឲ្យដឹងថា គាត់បានប្រទះឃើញក្មេងប្រុសនេះពេលគាត់ទៅផ្ទះលោក Wei បំណងខ្ចីឧបករណ៍ធ្វើស្រែ ។
ស្ត្រីវ័យ ៧២ឆ្នាំរូបនេះប្រាប់ថា គាត់បានស្រែកហៅតែពុំឃើញមានអ្នកមកបើកទ្វារ ហើយទឹកចេះតែឃើញហូរពីជាន់លើមក ។ គាត់បានដើរចូលទៅ ហើយក៏ឃើញក្មេងនេះនៅដេកក្បែរសាកសពជីតារបស់វា និងមានដង្ហើមនៅឡើយ គាត់ក៏ប្រញាប់បីវាយកមកក្រៅពឹងអ្នកជិតខាងជួយ ។
ក្រោយពេលផ្តល់ទឹកដោះគោ និងបង្គ្រប់ជាតិទឹកឲ្យវាក៏ដឹងស្មារតីមកវិញ ។
Wei Jiang អ្នកជិតខាងរបស់លោក Wei Ximing ប្រាប់ថា ៖ “ក្មេងនេះពិតជាមានសំណាងណាស់… ប៉ុន្មានថ្ងៃមុនខ្ញុំឮសូរសំឡេងក្មេងយំ តែយើងពុំបានចាប់អារម្មណ៍ ព្រោះរវល់រឿងស្រែចម្ការ” ។
ក្មេងប្រុសនេះត្រូវរស់នៅជាមួយជីតា ក្រោយពេលម្តាយរបស់វាចាកចោលទៅបាត់ ខណៈពេលឪពុកត្រូវធ្វើការនៅឯក្វាងតុងឯណោះ ៕ ចន្ទ្រា