មានមនុស្ស៧នាក់តម្រូវឱ្យមានការព្យាបាល ក្រោយករណីផ្ទុះបរិក្ខារចល័តមួយក្នុងខ្សែរថភ្លើងក្រោមដី នាទីក្រុងMadrid ប្រទេសអេស្ប៉ាញ កាលពីថ្ងៃទី១៧កញ្ញា។
ស្ថាប័នគ្រាមានអាសន្ន Madridបញ្ជាក់ថាក្នុងចំណោមមនុស្ស១២នាក់ដែលតម្រូវឱ្យមានការថែទាំសុខាភិបាល មាន៣នាក់រងផលប៉ះពាល់ដោយសារផ្សែងដែលចេញពីបរិក្ខារដែលឆេះនោះ។
តាមសមត្ថកិច្ច បរិក្ខារនេះត្រូវបានដាក់ក្នុងបាឡូរបស់អ្នកដំណើរម្នាក់ រួចស្រាប់តែផ្ទុះឡើងបង្កជាចលាចលក្នុងទូរថភ្លើង នៅស្ថានីយPrincipe de Vergara នាកណ្ដាលរដ្ឋធានីMadrid។
ពេលនេះគេពុំទាន់មានព័ត៌មានជាក់លាក់ថាវាជា Laptop ឬទូរស័ព្ទចល័តឡើយ ។កងកម្លាំងប្រឈមគ្រាមានអាសន្នបានមានវត្តមានភ្លាមៗនៅកន្លែងកើតហេតុ ហើយប៉ូលិសបានបើកការស៊ើបអង្កេត។
ករណីនេះបានបង្កឱ្យមានភាពរាំងស្ទះសេវារថភ្លើងក្រោមដីដែលតភ្ជាប់Sainz de Barranda ទៅកាន់Avenida de America ។ ប្រមាណ៣០នាទីក្រោយកើតហេតុ ទើបគេអាចបន្តសេវាកម្មនេះបាន៕
លីសា