ឧក្រិដ្ឋជនបច្ចុប្បន្នប្លន់មិនរើសមុខ មិនថាក្មេងឬចាស់ ឲ្យតែបានផ្តល់ផលប្រយោជន៍ដល់ពួកគេ។ ចោរប្លន់មិនមែនសុទ្ធតែមានថ្ងៃល្អ និងអាចប្លន់បានសម្រេចគ្រប់ពេលនោះទេ ដូចករណីប៉ងប្លន់ប្រដាប់អាវុធមួយនេះជាដើម ដោយចោរស្ទើភ្លើងនោះ បានដកកាំភ្លើងបំរុងភ្ជង់អ្នកគិតលុយម្នាក់ក្នុងហាងលក់បារីអេឡិចត្រូចនិច ប៉ុន្តែបែរជាដកកាំភ្លើងភ្លាត់ស្នៀត មានអី ត្រូវរត់បាតជើងសព្រាតខ្លួនឯង។
ករណីប៉ងប្លន់ប្រដាប់អាវុធនេះ កើតឡើងកាលពីពេលថ្មីៗនៅក្នុងរដ្ឋ Colorado សហរដ្ឋអាមេរិច។
បើតាមវីដេអូ បានបង្ហាញថា មានបុរសម្នាក់ដើរចូលក្នុងហាង ហើយនៅពេលដើរចូលមកដល់កន្លែងគិតលុយ គាត់ក៏បានដកកាំភ្លើងចេញពីហោប៉ៅ ប៉ុន្តែមិប្រយ័ត្នក៏របូតកាំភ្លើងធ្លាក់នៅកន្លែងគិតលុយ ហើយអ្នកគិតលុយស្ទុះទៅរើសវាយ៉ាងលឿន បណ្តាលឲ្យចោរភ័យស្លន់ស្លោរ រត់ចេញទៅក្រៅយ៉ាងលឿន។
ដំបូងឡើង ចោរនោះព្យាយាមលោតចូលកន្លែងគិតលុយ ដើម្បីរើសកាំភ្លើងមកវិញ ប៉ុន្តែគេមិនអាចធ្វើវាបាន ក៏បង្ខំចិត្តរត់យករួចខ្លួនតែម្តង។
បន្ទាប់ពីហេតុការណ៍ប៉ុនប៉ងប្លន់មិនបានសម្រេចនោះ អ្នកគិតលុយបានប្រាប់ថា វាគ្រាន់តែជាកាំភ្លើងជ័រប៉ុណ្ណោះ៕ សុភ័ក្ត្រ
ប្រភព៖ Trends zilla