ប្រភពពីស៊ីនហួ ឱ្យដឹងថា រដ្ឋមន្ត្រីការពារជាតិUkraine Stepan Poltorak នៅថ្ងៃទី១៧កញ្ញា បានធ្វើការបដិសេធចំពោះសេចក្ដីថ្លែងការណ៍ថ្មីមួយជុំវិញករណីយន្តហោះBoeing 777 មានលេខសម្គាល់ MH17 ដែលបានធ្លាក់កាលពីឆ្នាំ២០១៤ របស់ក្រុមអាកាសចរណ៍Malaysian Airlines ។
លោកStepan Poltorak ចាត់ទុកថា ការដែលរុស្ស៊ីលើកឡើងថាកាំជ្រួចបាញ់ទម្លាក់យន្ដហោះនេះជារបស់Ukraine គឺជារឿង«បោកប្រាស់»។នៅថ្ងៃដដែលវេលាមុននោះ មេបញ្ជាការកងកម្លាំងកាំជ្រួចរបស់រុស្ស៊ីឧត្តមសេនីយ៍ទោ Nikolai Parshin បានធ្វើការប្រកាសជាសាធារណៈនូវឯកសារបង្ហាញឱ្យឃើញកាំជ្រួចបាញ់ទម្លាក់យន្តហោះMH17ត្រូវបានផលិតនៅរោងចក្រយោធាមួយជិតក្រុងមូស្គូ ហើយត្រូវបានដឹកជញ្ជូនទៅកាន់Ukraine នាឆ្នាំ១៩៨៦។
ឯកសារនេះបង្ហាញថាកាំជ្រួចខាងលើគឺជារបស់កងកម្លាំងប្រដាប់អាវុធUkraine។
គួររំលឹកថា យន្ដហោះMH17កំពុងធ្វើដំណើរពី Amsterdam ទៅកាន់Kuala Lumpur បានត្រូវធ្លាក់នៅថ្ងៃទី១៧ខែកក្កដា ឆ្នាំ២០១៤ ក្នុងតំបន់ជម្លោះនាភាគបូព៌ាប្រទេសUkraine ធ្វើឱ្យអ្នកនៅលើយន្តហោះទាំងអស់២៩៨នាក់បានស្លាប់៕
សូយន
