ភ្នំពេញ ៖ លោកគល់ យី អធិការប៉ូលិសខណ្ឌឫស្សីកែវ បានប្រាប់ថា ៖ ឃាត់ខ្លួនជនសង្ស័យខាងលើករណីលួច (លួចកាបូបស្ពាយដែលនៅក្នុងនោះមាន ប្រាក់ដុល្លារ២៨០០ដុល្លារ និងប្រាកខ្មែរ១.៤០០.០០០រៀល និងទូរស័ព្ទដៃ៧គ្រឿង) នៅចំណុចគ្លីនិចពន្លឺរស្មី ផ្លូវ១៩២៨(ផ្លូវម៉ុងរិទ្ធី) ក្រុមទី៧ ភូមិគង្គាផុស សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ កាលពីរសៀលថ្ងៃទី១៨ខែកញ្ញាឆ្នាំ២០១៨នេះ។
លោកអធិការប៉ូលិសខណ្ឌឫស្សីកែវ បានអោយដឹងទៀតថា ជនរងគ្រោះឈ្មោះ ខឹម រ៉ានី ភេទស្រី អាយុ៥០ឆ្នាំ មុខរបរ ពេទ្យ ស្នាក់នៅ ចំណុចកើតហេតុខាងលើ ។
ចំណែកជនសង្ស័យប្តីឈ្មោះ ឡូញ ណេត ភេទប្រុស អាយុ៣៥ឆ្នាំ មុខរបរ រត់តាក់ស៊ី មានទីលំនៅ ភូមិកាត់កណ្តឹង សង្កាត់ចោមចៅ២ ខណ្ឌពោធិ៍សែនជ័យ និងជនសង្ស័យប្រពន្ធឈ្មោះ សុខ សែ ភេទស្រីអាយុ៣៥ឆ្នាំ មុខរបរ នៅផ្ទះ ស្នាក់នៅជាមួយប្តី ។
ចំពោះសម្ភាារក្នុងកាបូបស្ពាយពណ៌ខៀវរួមមាន ប្រាក់ដុល្លារ២៨០០ដុល្លារ ប្រាក់ខ្មែរ១.៤០០.០០០រៀល និងទូរស័ព្ទដៃស្មាតហ្វូន៧គ្រឿង (បានប្រគល់ជូនជនរងគ្រោះវិញហើយ) ។
សម្ភារសម្រាប់បម្រើក្នុងការប្រព្រឹត្តរថយន្តមួយគ្រឿង ម៉ាកសាមយ៉ុង ពណ៌សរ ពាក់ស្លាលេខ ភ្នំពេញ 2U 0762 ។
លោកគល់ យីអធិការប៉ូលិសខណ្ឌឫស្សីកែវ បានអោយដឹងថា នាមុនពេលកើតខាងលើនេះ ជនសង្ស័យបានបើករថយន្តសាមយ៉ុងរបស់ខ្លួន ដឹកប្រពន្ធនិងកូន២នាក់ មកពេទ្យ ពេលដែលចូលដល់ក្នុងពេទ្យ ឃើញឱកាសល្អក៏លួចយកកាបូបស្ពាយ ដើរយកចេញមកក្រៅដល់រថយន្ត ក៏ត្រូវជនរងគ្រោះ និងបុគ្គលិកនៅទីនោះ ចាប់បានភ្លាមៗផងដែរ។
កម្លាំងជំនាញខណ្ឌ និងប៉ុស្តិ៍ កំពុងកសាងសំណុំរឿងបញ្ជូន ជនសង្ស័យតាមនីតិវិធី៕ ដោយ៖បញ្ញាស័ក្តិ
