ប៉ូលិសភូមាកំពុងតាមរុករកអ្នកទោស៣០នាក់ដែលបានរត់ចេញពីគុក ហើយរត់សំដៅទៅតំបន់ព្រំដែនជាប់ជាមួយប្រទេសថៃ។
មន្ត្រីភូមាម្នាក់ទើបឱ្យដឹងថា កាលពីថ្ងៃទី១៧កញ្ញា មានអ្នកទោសជាច្រើនបានវាយប្រហារនិងប្លន់យករថយន្ដដឹកសំរាមមួយ គ្រឿង រួចប្រើប្រាស់រថយន្តនេះដើម្បីបុកបំបាក់ទ្វារគុកHpa-An នៅរដ្ឋ Karen រួចរត់ចេញក្រៅ។
មានអ្នកទោសប្រមាណ១០នាក់ត្រូវបានប៉ូសិលតាមរកឃើញនិងចាប់ខ្លួនបានវិញប៉ុន្តែមានប្រមាណ៣០នាក់ផ្សេងទៀតកំពុងរត់គេចខ្លួនតាមភូមិជាប់ព្រំដែនជាមួយថៃ ធ្វើឱ្យប្រជាជានមានការព្រួយបារម្ភយ៉ាងខ្លាំង។
មន្ត្រីប្រចាំតំបន់ Khin Thet Mar បាននិយាយថា៖ ពួកអ្នកទោសទាំងនោះគ្មានអ្វីសម្រាប់បរិភោគ ហើយក៏គ្មានលុយ ទើបពលរដ្ឋភ័យខ្លាចពួកវាវាយប្រហារពួកគេដើម្បីប្លន់យករបស់ដែលវាត្រូវការ។មន្ត្រីមូលដ្ឋានដដែលឱ្យដឹងបន្ថែមថា កងកម្លាំងភូមាកំពុងប្រឹងទប់ស្កាត់កុំឱ្យអ្នកទោសទាំងនោះរត់គេចខ្លួនទៅកាន់ប្រទេសថៃ។
តាមប្រព័ន្ធផ្សព្វផ្សាយនៅតំបន់នោះឱ្យដឹងថា មេខ្លោងរៀបចំផែនការនេះត្រូវបានកាត់ទោសឱ្យជាប់គុកមួយជីវិតពីបទជួញដូរគ្រឿងញៀន លាក់អាវុធនិងសម្លាប់មនុស្ស៕
សូយន
