ភ្នំពេញ ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានឲ្យដឹងនៅថ្ងៃទី១៩ ខែកញ្ញា ឆ្នាំ២០១៨នេះថា សំរាមប្រមាណ ២.៧០០តោន ត្រូវបានបង្កើតឡើងក្នុងមួយថ្ងៃៗ។ កំណើនសំរាមនៅក្នុងរាជធានីភ្នំពេញ និងនៅតាមទីប្រជុំជននានា ជាក្តីកង្វល់របស់យើងទាំងអស់គ្នាហើយចាំបាច់គ្រប់ស្ថាប័នពាក់ព័ន្ធ ប្រជាពលរដ្ឋគ្រប់មជ្ឈដ្ឋាន ត្រូវចូលរួមគ្រប់គ្រងសំណល់ដែលខ្លួន បង្កើតឡើងឲ្យបានល្អត្រឹមត្រូវ ដើម្បីចៀសវាងការបំផ្លាញបរិស្ថាន បំផ្លាញសោភ័ណភាពសហគមន៍ខ្លួន។
លោក នេត្រ ភក្ត្រា បានបញ្ជាក់ថា ដោយសារតែកំណើនប្រជាពលរដ្ឋ ការផ្លាស់ប្តូរជីវភាពរស់នៅរបស់ប្រជាពលរដ្ឋ និងទំនៀមទម្លាប់នៃការប្រើប្រាស់ និងការវេចខ្ចប់ទំនិញ ហើយការកែច្នៃពីសំរាមនៅមានកម្រិតទាបនៅឡើយ។ កត្តាទាំងនេះបានធ្វើឲ្យសំរាមសំណល់រឹង មានបរិមាណកើនឡើង។ កំណើនបរិមាណសំរាម សំណល់រឹង គឺជាបញ្ហាចម្បងមួយនៅក្នុងបណ្តាបញ្ហាប្រឈមនានា លើការងារគ្រប់គ្រងបរិស្ថាននៅរាជធានីភ្នំពេញ និងនៅតាមទីប្រជុំជន ដែលទាមទារឲ្យមានការចូលរួមសហការ ដោះស្រាយរួមគ្នា ដើម្បីទប់ស្កាត់ កាត់បន្ថយការបំពុលបរិស្ថាន និងផលប៉ះពាល់សុខភាពប្រជាពលរដ្ឋ តាមរយៈការយកចិត្តទុកដាក់លើការងារគ្រប់គ្រងសំរាមសំណល់រឹងឲ្យបានត្រឹមត្រូវ។
លោក នេត្រ ភក្ត្រា បានថ្លែងថា ដើម្បីលើកកម្ពស់សោភ័ណភាព សណ្តាប់ធ្នាប់ និងអនាម័យបរិស្ថានសាធារណៈ ក៏ដូចជាចូលរួមទប់ស្កាត់ការបំពុលបរិស្ថាន ទឹក ដី ខ្យល់ ដែលបណ្តាលមកពីការគ្រប់គ្រងសំរាម សំណល់រឹង មិនបានត្រឹមត្រូវតាមលក្ខណៈបច្ចេកទេស គ្រប់ភាគីទាំងអស់ត្រូវយកចិត្តទុកដាក់ក្នុងការគ្រប់ គ្រងសំណល់សំរាមដែលខ្លួនបង្កើតឡើង។
ហាមដាច់ខាតនូវការបោះចោលសំរាម សំណល់រឹងនៅតាមដងផ្លូវ ទីសាធារណៈ ទីវាលតាម ប្រពន្ធ័ ទឹកលូ ឬប្រភពទឹកសាធារណៈ ឬក្នុងដីកម្មសិទ្ធឯកជន។ ហាមដាច់ខាតនូវការដុតសំរាមសំណល់រឹង ក្នុងករណីគ្មានការអនុញ្ញាតពីក្រសួងបរិស្ថានឬមន្ទីរបរិស្ថាន។
លោករដ្ឋលេខាធិការបានលើកឡើងថា គុណភាពប្រមូល និងដឹកជញ្ជូនសំរាមរបស់ក្រុមហ៊ុនផ្តល់សេវានៅមានកម្រិត ហើយទីប្រជុំជនភាគច្រើននៅពុំទាន់មានទីលានទុកដាក់សំណល់ត្រឹមត្រូវតាមគោលការណ៍ណែនាំបច្ចេកទេសនៅឡើយ ដែលទាមទារឲ្យគ្រប់ភាគីពាក់ព័ន្ធចូលរួមទាំងអស់គ្នា។ការចូលរួម និងការយល់ដឹងអំពីការទុកដាក់សំរាមរបស់ប្រជាពល រដ្ឋនៅមានកម្រិតនៅឡើយ។ លោកបានស្នើឲ្យប្រជាពលរដ្ឋចូលរួមសម្អាតបរិស្ថាន វេចខ្ចប់ទុកដាក់សំរាមឲ្យបានត្រឹមត្រូវ៕ ដោយ ៖ បញ្ញាស័ក្តិ