នៅថ្ងៃទី២០ ខែកញ្ញា ប្រធានាធិបតីកូរ៉េខាងត្បូងឱ្យដឹងថា លោកកំពុងរក្សាទុកនូវ«សារឯកជន» ដែលមេដឹកនាំកូរ៉េខាងជើង Kim Jong-un ផ្ញើទៅកាន់ប្រធានាធិបតីអាមេរិកDonald Trump ។
តាមទីភ្នាក់ងារសារព័ត៌មាន Yonhap ឱ្យដឹងថា ប្រធានាធិបតីកូរ៉េខាងត្បូងបានលើកឡើងច្បាស់ថា លោកនិងមេដឹកនាំកូរ៉េខាងជើងបានពិភាក្សាគ្នាក្នុងសន្និសីទកំពូលអន្តរកូរ៉េដែលទើបបានប្រព្រឹត្តទៅនៅក្រុងព្យុងយ៉ាង តែពុំត្រូវបានលើកឡើងក្នុងសេចក្ដីថ្លែងការណ៍រួមដែលប្រកាសជាសាធារណៈនៅថ្ងៃទី១៩កញ្ញា។
ប្រធានាធិបតីកូរ៉េខាងត្បូងMoon Jae-in គម្រោងនឹងបញ្ជូនសារនេះយ៉ាងលំអិតដល់ភាគីអាមេរិកក្នុងជំនួបខាងមុខជាមួយប្រធានាធិបតីអាមេរិកDonald Trump។
ទោះយ៉ាងណា លោកMoon ក៏បានបង្ហើបរឿងខ្លះដែលពុំបានសរសេរក្នុងសេចក្តីថ្លែងការណ៍រួម ជាអាទិ៍ភាគីទាំងពីរបាន ព្រមព្រៀងរៀបចំឱ្យមានកិច្ចសន្ទនារវាងរដ្ឋសភាប្រទេសទាំងពីរ ។
គួរកត់សម្គាល់ថា ក្រោយពេលបញ្ចប់ទស្សនកិច្ចនៅកូរ៉េខាងជើង លោកMoon បានធ្វើសន្និសីទកាសែតនៅក្រុងសេអ៊ូលដោយបញ្ជាក់ប្រាប់ថា៖ កូរ៉េខាងជើងបានត្រៀមខ្លួនជំរុញការរំសាយនុយក្លេអ៊ែរពេលដែលអាមេរិកមានជំហានដើរស្របគ្នា។ មេដឹកនាំកូរ៉េខាងជើងKim បានសម្ដែងនូវក្តីសង្ឃឹមក្នុងការរំសាយនុយកេ្លអ៊ែរឱ្យបានសម្រេចក្នុងរយៈ ពេលឆាប់បំផុត ហើយប្រាថ្នាចង់ដំណើរការជំនួបកំពូលលើកទី២ជាមួយប្រធានាធិបតីអាមេរិក Donald Trump។
លោកMoon នូវបានឱ្យដឹងថា ភាគីកូរ៉េទាំងពីរបានឯកភាពលើនិយមន័យតែមួយអំពីសេចក្តីច្លែងការណ៍បញ្ចប់សង្គ្រាម។ ការចុះហត្ថលេខាលើសន្ធិសញ្ញាសន្តិភាពជាមួយកូរ៉េខាងជើងនឹងប្រព្រឹត្តទៅក្រោយការរំសាយរួចរាល់នុយក្លេអ៊ែរ។
ចំពោះទំនាក់ទំនងអន្តរកូរ៉េ លោក Moon ប្រាប់ថា លោកKim ចង់ប្រមូលផ្ដុំទៅលើការអភិវឌ្ឍសេដ្ឋកិច្ច ហើយបណ្ដាការ ចរចាជាន់ខ្ពស់អន្តរកូរ៉េនឹងត្រូវបានរៀបចំនៅថ្ងៃណាមួយជិតមកដល់នេះ ដើម្បីពិភាក្សាអំពីការចាត់តាំងអនុវត្តន៍ខ្លឹមសារនៃកិច្ចព្រមព្រៀងថ្មីៗនេះ។លោកMoon បានអះអាងបន្ថែមថា កិច្ចព្រមព្រៀងយោធាថ្មីនឹងលុបចោលជារៀងរហូតចំពោះគ្រប់ការគំរាមកំហែងនៃសង្គ្រាមនៅលើឧបទ្វីបកូរ៉េ។
នៅថ្ងៃដដែលនេះ ទីភ្នាក់ងារសារព័ត៌មានកូរ៉េខាងជើង KCNA ក៏បានធ្វើការផ្សព្វផ្សាយយ៉ាងសកម្មអំពីសេចក្តីថ្លែងការណ៍រួមរវាងកូរ៉េទាំងពីរផងដែរ៕
សូយន
