លោក Andres Manuel Lopez Obrador ដាច់ខាតលក់យន្តហោះពិសេសសម្រាប់ប្រធានាធិបតី ហើយប្រើប្រាស់យន្តហោះធម្មតា ដូចជាពលរដ្ឋសាមញ្ញ ទោះបីវារងការពន្យាពេលម្តងៗក្តី។
ប្រព័ន្ធផ្សព្វផ្សាយនៅតំបន់ឲ្យដឹងថា ជើងហោះហើរពីរដ្ឋ Oaxaca ទៅកាន់រដ្ឋធានី Mexico city ដែលលោក Obrador ជិះកាលពីថ្ងៃទី ១៩ ខែកញ្ញា បានត្រូវផ្អាកការហោះហើរ ដល់ទៅ ៤ម៉ោង ក្នុងនោះត្រូវអង្គុយរង់ចាំលើយន្តហោះអស់ ៣ម៉ោង ព្រោះភ្លៀងធំពេកបង្ខំចិត្តត្រូវបិទទ្វារ ។
ប៉ុន្តែទោះយ៉ាងនេះក្តី លោក Obrador បានឆ្លើយដាច់ណាត់ទៅកាន់អ្នកកាសែតថា ៖ “រឿងដូច្នេះពុំបានធ្វើឲ្យខ្ញុំប្តូរបំណងឡើយ ។ ខ្ញុំនឹងមិនឡើងជិះយន្តហោះប្រធានាធិបតីទេ” ។ លោកបន្តថា ៖ “ខ្ញុំមានអារម្មណ៍ខ្មាសអៀន ពេលឡើងយន្តហោះប្រណីត នៅទឹកដីមួយដែលកំពុងស្ថិតក្នុងភាពក្រខ្សត់គ្រប់កន្លែងដូច្នេះ” ។
យន្តហោះពិសេសរបស់ប្រធានាធិបតីម៉ិកស៊ីកូ គឺប្រភេទ Boeing 787 Dreamliner មានតម្លៃ ២១៨,៧ លានដុល្លារ ហើយទើបប្រើប្រាស់បាន ២ឆ្នាំមុន ដែលអតីតប្រធានាធិបតី Felipe Calderon បានបញ្ជាឲ្យទិញ ។
លោក Obrador នៅបានសន្យានឹងប្រែក្លាយវិមានប្រធានាធិបតីឲ្យទៅជាមជ្ឈមណ្ឌលវប្បធម៌ ហើយប្តូរទៅធ្វើការក្នុងអគារសាមញ្ញមួយដោយមិនទទួលប្រាក់ខែ ហើយប្តេជ្ញាដោះស្រាយអំពើពុករលួយដែលកំពុងញាំញីប្រទេសមួយនេះ ។
ម៉ិចស៊ីកូក៏កំពុងមានផែនការកសាងព្រលានយន្តហោះថ្មីតម្លៃ ១៣ពាន់លានដុល្លារ នៅរដ្ឋធានី ជំនួសឲ្យព្រលានយន្តហោះបច្ចុប្បន្នដែលតូចចង្អៀត ប៉ុន្តែលោក Obrador មិនយល់ព្រម ដោយឲ្យកសាងផ្លូវហោះហើរ ២ នៅមូលដ្ឋានទ័ពអាកាសវិញ ។
ខែតុលាខាងមុខគេនឹងធ្វើប្រជាមតិរឿងនេះ ៕ ចន្ទ្រា