ឈុតឆាកហេតុការណ៍អគ្គិភ័យឆាបឆេះ ដែលត្រូវបានថតនៅក្នុងភាពយន្តឆ្នាំថ្មីរបស់ចិន «Amazing Spring» បានប្រែក្លាយទៅជាមហន្តរាយរន្ធត់មួយ បន្ទាប់ពីតារាប្រុសស្រីចំនួន ៣១ នាក់ ត្រូវបានរាយការណ៍ថា បានរងការរលាកភ្លើងធ្ងន់ធ្ងរ ។
យោងតាម The Star ហេតុការណ៍នេះបានកើតឡើងនៅវេលាម៉ោងប្រហែល ៧ យប់ ថ្ងៃច័ន្ទ នៅពេលដែលភ្លើងបានធ្វើឲ្យរងរបួសដល់តារាស្រីហុងកុង Sharon Yeung Pan-pan អាយុ ៥៩ ឆ្នាំ, តារាស្រីម៉ាឡេស៊ី Joey Leong អាយុ ២៤ ឆ្នាំ និងតារាប្រុសលោក Cedric Loo អាយុ ៣០ ឆ្នាំ ខណៈថតភាពយន្តនៅក្នុង Bandar Bukit Puchong, Selangor ប្រទេសម៉ាឡេស៊ី ។
នាយកដ្ឋានសង្គ្រោះ និងអគ្គីភ័យ បានធ្វើការស៊ើបអង្កេត និងរកឃើញថា ប្រេងដែលក្រុមការងារផលិតភាពយន្តបានចាក់ទៅលើផ្ទះឈើមួយនោះ បានបង្កឲ្យកើតមានហេតុការណ៍នេះឡើង ។ បើតាមសេចក្តីរាយការណ៍ នោះតារាប្រុសស្រីជាច្រើនត្រូវបានជូនដំណឹងដោយក្រុមការងាររបស់ពួកថា ពួកគេចង់ថតឈុតឆាករងរបួសរលាក នៅក្នុងហេតុការណ៍ភ្លើងឆេះ ។
អ្នកនាំពាក្យម្នាក់និយាយថា៖ «ដំណើរការចំហាយត្រូវបានធ្វើទៅលើសម្លៀកបំពាក់តារាប្រុស ហើយនៅពេលប្រេងត្រូវបានបង្កាត់ឡើង នៅពេលនោះសម្លៀកបំពាក់របស់ពួកគេក៏ត្រូវបានបានឆាបឆេះតែម្តង» ។ អ្នកនាំពាក្យម្នាក់នោះបានបន្ថែមថា មានអ្នកពន្លត់អគ្គីភ័យបានប្រចាំការនៅឯកន្លែងថតភាពយន្តនេះផងដែរ ។
ផលិតករម៉ាឡេស៊ី លោក Jack Lim បានពន្យល់ក្នុងសន្និសីទកាសែតនៅមជ្ឈមណ្ឌលវេជ្ជសាស្ត្រ Sunway ទីកន្លែងដែលតារាប្រុសស្រីរងរបួសត្រូវបានបញ្ជូនមកសង្គ្រោះថា ពួកគេមានផែនការដុតឲ្យឆេះផ្ទះ៣ខ្នង សម្រាប់ការថតភាពយន្តនេះ ។
គាត់បានបន្ថែមថា ក្រុមពន្លត់អគ្គីភ័យស្ថិតនៅកន្លែងកើតហេតុបានធានាថា តួសម្តែងទាំងអស់សុទ្ធតែស្ថិតនៅចម្ងាយមួយដ៏សុវត្ថិភាព ។
លោក Lim បន្តថា៖ «ប៉ុន្តែ អ្វីៗគឺយើងពុំនឹកស្មានដល់ថាភ្លើងបានរីករាលដាលដល់ដី ហើយឈានដល់ពួកគេបែបនេះនោះទេ» ។
វេជ្ជបណ្ឌិត Seow Vei Ken ប្រធាននាយកដ្ឋានសង្គ្រោះបន្ទាន់ និងគ្រោះថ្នាក់របស់មន្ទីរពេទ្យ បានប្រាប់សារព័ត៌មានថា អ្នកនាង Yeung បានរងរបួស៖ «៧% នៃរលាកកម្រិតទី២ នៅលើផ្ទៃមុខរបស់នាងចំហៀងខាងឆ្វេង, ដៃស្តាំ និងជើងទាំងសងខាង» ។
ចំណែកលោក Leong រងរបួស ៥% នៃការរលាកកម្រិតទី២ នៅលើជើងទាំងសងខាង ។ វាអាចធ្វើឲ្យជនរងគ្រោះសះស្បើយពីរបួសឡើងវិញក្នុងរយៈពេល ៣ សប្តាហ៍ ៕ ឧត្តម (ប្រភព៖ nextshark)