ខេត្តព្រះសីហនុ ៖ បន្ទាប់ពីបានបញ្ចប់ទស្សកិច្ច ក្នុងវេទិកាសេដ្ឋកិច្ចពិភពលោក នៅប្រទេសចិនរយៈពេល៥ថ្ងៃ កាលពីល្ងាចថ្ងៃសៅរិ៍ថ្ងៃទី២២ ខែកញ្ញា ឆ្នាំ២០១៨ លោក យន្ត មីន អភិបាលនៃគណៈអភិបាលខេត្តព្រះសីហនុ បានត្រឡប់មកដល់មាតុប្រទេសវិញហើយ និងបានផ្តល់បទសម្ភាសដល់អ្នកសារព័ត៌មាននៅព្រលានយន្តហោះអន្តរជាតិភ្នំពេញ។
លោក យន្ត មីន មានប្រសាសន៍ថា ក្នុងវិទិការសេដ្ឋកិច្ចពិភពលោកនេះដែរ ប្រទេសជាច្រើនដែលបានចូលរួមសុទ្ធតែបានអូសទាញអ្នកវិនិយោគចិន អោយចូលទៅបណ្តាក់ទុនរកស៊ីក្នុងប្រទេសរៀងៗខ្លួន។
ទន្ទឹមគ្នានេះដែរ លោក យន្ត មីន អះអាងថា ក្នុងនាមប្រទេសកម្ពុជា ជាពិសេសខេត្តព្រះសីហនុ រូបលោកក៏បានខិតខំទាក់ទាញអ្នកវិនោយោគទុនចិន ដើម្បីធ្វើយ៉ាងណាអោយពួកគេ ចូលមកបណ្តាក់ឲ្យបានកាន់តែច្រើនថែមទៀត នៅគ្រាបច្ចុប្បន្ននេះ អ្នកវិនិយោគទុនចិន កំពុងមានសន្ទុះសេដ្ឋកិច្ចខ្លាំងលើពិភពលោក ហើយក៏ស្របទៅនឹងគោលនយោបាយផ្លូវមួយខ្សែក្រវ៉ាត់មួយ របស់ប្រមុខរដ្ឋចិន ស៊ីជិនពីង។
លោក យន្ត មីន ឲ្យដឹងដូច្នេះ រួចបញ្ជាក់ថា រូបលោកមានសុទិដ្ឋិយមថា អ្នកវិនិយោគនឹងសំឡឹងមើលខេត្តព្រះសីហនុសម្រាប់ជាគោលដៅវិនិយោគដ៏សំខាន់ ស្របពេលបច្ចុប្បន្នភាព នៃខេត្តព្រះសីហនុពោរពេញដោយ សក្តានុពល និងត្រូវបានរដ្ឋាភិបាល បានចាត់ទុកខេត្តព្រះសីហនុ ថាជាខេត្តបំពង់កសេដ្ឋកិច្ចតែមួយគត់ របស់កម្ពុជា។
លោក យន្ត មីន បន្តថា ខេត្តព្រះសីហនុ បច្ចុប្បន្ននេះកំពុងមានការទាក់ទាញខ្លាំងក្នុងការវិនិយោគពហុវិស័យ សម្រាប់វិនិយោគិន ជាពិសេសចិន។
គួររំលឹកថា ចាប់ពីថ្ងៃទី១៧ ដល់ ថ្ងៃទី២០ ខែកញ្ញា ឆ្នាំ២០១៨ លោក យន្ត មីន អភិបាលខេត្តព្រះសីហនុបានដឹកនាំគណៈប្រតិភូខេត្តព្រះសីហនុ ទៅចូលរួមក្នុងវេទិកាសេដ្ឋកិច្ចពិភពលោក នៅទីក្រុងធានជីញ ប្រទេសចិន។
បន្ទាប់មកនៅថ្ងៃទី២១ ខែកញ្ញាឆ្នាំ២០១៨ លោក យន្ត មីន បានបន្តដំណើរទស្សនកិច្ចនៅទីក្រុងឆឹងទូ ខេត្តស៊ីឈួន ទៅតាមការការអញ្ជើញរបស់អភិបាលខេត្តស៊ីឈួន និងបានចូលជួបសម្តែងការគួរសម និងពិភាក្សាការងារជាមួយ លោក យិន លី អភិបាលខេត្តស៊ីឈួន។
លោកបន្តថា នៅក្នុងជំនួបនោះ បានជម្រាបពីសក្តានុពលខេត្តព្រះសីហនុ និងផ្សព្វផ្សាយដល់វិនិយោគគិនចិន ឲ្យចូលមកវិនិយោគ នៅកម្ពុជា ជាពិសេសខេត្តព្រះសីហនុ។
លើសពីនេះទៀត ភាគីទាំងពីរក៏បានពិភាក្សាអំពីកិច្ចសហប្រតិបត្តិការ និងការបង្កើតចំណងមិត្តភាព រវាងខេត្តព្រះសីហនុ និងខេត្តស៊ីឈួន លើវិស័យឧស្សាហកម្ម ពាណិជ្ជកម្ម ទេសចរណ៍ សំណង់ ដឹកជញ្ជូន និងអប់រំជាដើម…៕ ដោយ៖ ដែន សីមា
