វេជ្ជបណ្ឌិតជនជាតិម៉ាឡេស៊ីម្នាក់ ត្រូវបានកាត់ទោសឲ្យជាប់គុកអស់មួយជីវិត នៅក្នុងទីក្រុងហុងកុង បន្ទាប់ពីគាត់ត្រូវបានរកឃើញថាមានទោសពីបទសម្លាប់ប្រពន្ធ និងកូនស្រីរបស់គាត់ កាលពី ៣ ឆ្នាំ មុន ។
Khaw Kim Sun ជាគ្រូពេទ្យឯកទេសអាយុ ៥៣ ឆ្នាំ និងជាសាស្ត្រាចារ្យរង នៅសកលវិទ្យាល័យចិនក្នុងទីក្រុងហុងកុង ត្រូវបានរាយការណ៍ថា បានសម្លាប់ប្រពន្ធរបស់គាត់ឈ្មោះ Wong Siew Fing និងកូនស្រីអាយុ ១៦ ឆ្នាំ តាមរយៈធ្វើឲ្យលេចធ្លាយឧស្ម័នពិស (carbon monoxide) នៅក្នុងរថយន្តរបស់ពួកគេ ជាមួយការប្រើបាល់យូហ្គា ។
យោងតាម South China Moring Post បានរាយការណ៍ឲ្យដឹងថា Khaw មានកូន៤នាក់ជាមួយប្រពន្ធរបស់គាត់ ដែលបានធ្វើឲ្យគាត់ផ្ទុះរឿងលែងលះគ្នា បន្ទាប់មានទំនាក់ទំនងស្នេហាជាមួយសិស្សម្នាក់ ។ ទោះយ៉ាងនេះក្តី តែប្តីប្រពន្ធនេះនៅតែរស់នៅជាមួយគ្នា នៅក្នុងផ្ទះមួយនៅក្នុងទីក្រុងហុងកុង ។
យោងតាមឯកសារតុលាការជាន់ខ្ពស់ហុងកុង Khaw បានដាក់បាល់យូហ្គាផ្ទុកហ្គាសពេញ នៅក្នុងកន្លែងដាក់អីវ៉ាន់រថយន្ត Mini Cooper ប្រពន្ធរបស់គាត់ ដែលបានបើកចេញកាលពីថ្ងៃទី២២ ខែឧសភា ឆ្នាំ២០១៥ ព្រោះតែនាងត្រូវបានគេរាយការណ៍ឲ្យដឹងថា បានបដិសេធទទួលយកការលែងលះជាមួយ ។
រយៈពេលមួយម៉ោង បន្ទាប់ពីបើករថយន្តចេញពីផ្ទះរបស់ពួកគេ Wong និងកូនស្រី ត្រូវបានរកឃើញបាត់បង់ស្មារតីទៅហើយ នៅក្នុងរថយន្តរបស់ពួកគេ ដែលចតនៅចំណតរថយន្តក្រុងមួយ ។ ទីបំផុត ជនរងគ្រោះទាំងពីរត្រូវប្រកាសស្លាប់ ដោយសាររងការពុលកាបូនម៉ូណូស៊ីតដ៏ធ្ងន់ធ្ងរ ។
អ្នករួមការងារជាមួយ Khaw នៅសកលវិទ្យាល័យចិនហុងកុង ក្រោយមក បានបញ្ចេញឲ្យប៉ូលីសដឹងថា ពួកគេបានឃើញគាត់ចាកបំពេញបាល់២ជាមួយ «កាបូនម៉ូណូស៊ីត» ។
Khaw ដែលត្រូវបានចាប់ខ្លួននៅក្នុងខែកញ្ញា ឆ្នាំ២០១៧ ត្រូវបានរាយការណ៍ថា បានទទួលបានកាបូនម៉ូណូស៊ីតទាំងនោះ ពីមន្ទីរពេទ្យ ខណៈប្រាប់ក្រុមការងាររបស់គាត់ថា គាត់មានបំណង «សាកល្បងភាពសុទ្ធរបស់វា» និងឥទ្ធិពលរបស់វាទៅលើទន្សាយ ។
ទោះយ៉ាងណា គាត់បានផ្តល់ហេតុផលផ្សេងមួយ ទៅប៉ូលីស ដោយនិយាយថា គាត់យកហ្គាសនោះទៅផ្ទះ ដើម្បីសម្លាប់សត្វកណ្តុរ ។ អ្នកបម្រើក្នុងផ្ទះរបស់គាត់ ក៏បានផ្តល់សក្ខីកម្មនៅក្នុងតុលាការផងដែរ ដោយបានបញ្ជាក់ថា ផ្ទះរបស់ពួកគេពុំមានពពួកសត្វកកេនោះទេ ៕ ឧត្តម (ប្រភព៖ nextshark)