រដ្ឋមន្ត្រីការពារជាតិរុស្ស៊ី Sergei Shoigu នៅថ្ងៃទី២៤ខែកញ្ញា ប្រកាសថា ក្រុងមូស្គូនឹងផ្តល់ប្រព័ន្ធការពារS-300ដល់ស៊ីរីក្នុងអំឡុងពីរសប្តាហ៍ទៀត។លោកក៏បានឱ្យដឹងបន្ថែមថា រុស្ស៊ីនឹងចាប់ផ្តើមធ្វើការរំខានរលកសញ្ញារ៉ាដានិង ផ្កាយរណបរបស់យន្តហោះទាំងឡាយដែលវាយលុកចូលដែនដីស៊ីរីពីសមុទ្រម៉េឌីទែរ៉ាណេ។
សេចក្តីប្រកាសនេះត្រូវបានលើកឡើងបន្ទាប់ពីក្រសួងការពារជាតិរុស្ស៊ីចោទប្រកាន់អ៊ីស្រាអែលថាមានចេតនាដោយ ប្រយោលបណ្ដាលឱ្យធ្លាក់យន្តហោះយោធាIl-20របស់រុស្ស៊ីពេលដែលយន្តហោះប្រទេសនេះធ្វើការវាយលុកពីដែនអាកាស នៅថ្ងៃទី១៧កញ្ញាកន្លងមក។ហេតុនេះក្រុងមូស្គូចាំបាច់ត្រូវមានវិធានការតបតសមស្របក្នុងកិច្ចបង្កើនសន្តិសុខដល់ពលទាហានរុស្ស៊ីដែលស្ថិតនៅស៊ីរីក្រោយពីអ៊ីស្រាអែលមានទង្វើខាងលើ។
រដ្ឋមន្ត្រីការពារជាតិរុស្ស៊ីក៏បានអះអាងថា រុស្ស៊ីនឹងផ្តល់ប្រព័ន្ធត្រួតពិនិត្យទំនើបបំផុតដល់បណ្ដាទីបញ្ជាការនៃកងកម្លាំងការពារដែនអាកាសស៊ីរីដើម្បីធានា ដល់ការគ្រប់គ្រងប្រមូលផ្តុំទាំងស្រុងនូវមូលដ្ឋាននិងកងកម្លាំងការពារដែនអាកាសស៊ីរី ឃ្លាំមើលស្ថានការណ៍ក្នុងលំហអាកាសនិងការកំណត់គោលដៅ។
តាមរដ្ឋមន្ត្រីរូបនេះប្រការសំខាន់បំផុតគឺការធានាដល់កងកម្លាំងការពារដែនអាកាសស៊ីរី អាចកំណត់អត្តសញ្ញាណយន្តហោះរុស្ស៊ីទាំងអស់៕
លីសា