ភ្នំពេញ ៖ ចោរមួយក្រុម បានគាស់បំបែកជញ្ជាំងរោងចក្រស្បែកជើង ផាណាវ៉េ ចូលទៅខាងក្នុងបន្ទប់ការិយាល័យ គាស់ទូរដែក យកលុយអស់ជិត ៤ម៉ឺនដុល្លារ ដែលហេតុការណ៍នេះ បង្កការភ្ញាក់ផ្អើល កាលពីវេលាម៉ោង៦និង៣០នាទីព្រឹក នៅថ្ងៃទី ២៤ ខែកញ្ញា ឆ្នាំ២០១៨ ចំណុចរោងចក្រស្បែកជើង យីហោ ផាណាវ៉េ ផ្លូវបេតុង ក្រុម១ ភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ ។
ជនរងគ្រោះឈ្មោះ លី ភីង ភេទស្រី អាយុ៤១ឆ្នាំ ជនជាតិចិន អ្នកគ្រប់គ្រង រោងចក្រស្បែកជើង យីហោ ផាណាវ៉េ ស្នាក់នៅក្នុងរោងចក្រ ផាណាវ៉េ ភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ កាន់លិខិតឆ្លងដែនលេខ EA-9498541 ។ បាត់បង់លុយដុល្លារចំនួន ៣២.០០០ដុល្លារអាមេរិក លុយខ្មែរ ១០.០០០.០០០រៀល ។
សមត្ថកិច្ចបានចុះទៅដល់ចំណុចកើតហេតុ រកឃើញ ស្នាមគាស់ព្រិលជញ្ជាំង១ប្រឡោះ ហើយនៅកន្លែងកើតហេតុ មានបន្សល់ទុកអង្រឹង១ ខ្សែនីឡុង១ខ្សែ ស្បែកជើងផ្ទាត់ចំនួន៣គូ កាបូបស្ពាយ១ ពណ៌ក្រហម ស្នាមរើកកាយចំនួន៦បន្ទប់ ។
បច្ចុប្បន្នសមត្ថកិច្ច កំពុងស្រាវជ្រាវរកជនសង្ស័យ ដើម្បីយកមកផ្តន្ទាទោសតាមច្បាប់ ៕ ដោយ ៖ បញ្ញាស័ក្តិ
