ភ្នំពេញ ៖ យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់សាធារណៈ នៃអគ្គស្នងការដ្ឋាននគរបាលជាតិ បានឱ្យដឹងថា នៅថ្ងៃទី២៤ ខែកញ្ញា ឆ្នាំ២០១៨ មានករណីគ្រោះថ្នាក់ចរាចរនៅទូទាំងប្រទេស កើតឡើង ចំនួន១៣លើក (យប់៧លើក) បណ្តាលឲ្យមនុស្សស្លាប់៨នាក់ (ប្រុស) រងរបួសធ្ងន់១៦នាក់ (ស្រី៣នាក់) និងរបួសស្រាល៤នាក់ (ស្រី១នាក់) ក្នុងនោះអ្នកមិនពាក់មួកសុវត្ថិភាពពេលគ្រោះថ្នាក់ចរាចរ២១នាក់ (យប់១០នាក់)។
មូលហេតុដែលបណ្តាលឲ្យកើតមានករណីគ្រោះថ្នាក់ចរាចររួមមានៈ ល្មើសល្បឿន ៦លើក (ស្លាប់៤នាក់), មិនគោរពសិទ្ធិ ៣លើក(ស្លាប់ម្នាក់), ស្រវឹង ១លើក(ស្លាប់១នាក់), ប្រជែង១លើក, បត់គ្រោះថ្នាក់២លើក(ស្លាប់២នាក់)។ នៅក្នុងហេតុការណ៍គ្រោះថ្នាក់ចរាចរ១៣លើកនេះ បណ្តាលឲ្យខូចខាតយានយន្តសរុបចំនួន ២៦គ្រឿង រួមមាន ម៉ូតូ ចំនួន១៧គ្រឿង, រថយន្តធុនតូច ចំនួន៧គ្រឿង និងរថយន្តធំ ២គ្រឿង។ យានយន្តដែលបង្កហេតុ រួមមាន ម៉ូតូ ៩លើក, រថយន្តធុនតូច ចំនួន៣លើក, រថយន្តធុនធំ ១លើក។ គ្រោះថ្នាក់នៅលើដងផ្លូវ រួមមាន ផ្លូវជាតិ ចំនួន៩លើក, ផ្លូវខេត្ត ៤លើក។ រាជធានី-ខេត្ត ដែលមានគ្រោះថ្នាក់ និងរងគ្រោះថ្នាក់ រួមមាន ៖ ភ្នំពេញ ១លើក ស្លាប់ម្នាក់ របួស១នាក់,កំពង់ស្ពឺ២លើក ស្លាប់២នាក់ របួស២នាក់,ព្រះសីហនុ ១លើក ស្លាប់១នាក់, កំពត១លើក ស្លាប់១នាក់ របួស១នាក់(ស្រី), កំពង់ចាម ១លើក ស្លាប់១នាក់ របួស១នាក់, រតនគិរី១លើក ស្លាប់១នាក់ របួស១នាក់ និងខេត្តតាកែវ ១លើក ស្លាប់១នាក់។
តាមរបាយការណ៍គ្រោះថ្នាក់ចរាចរទូទាំងប្រទេស រយៈពេល២៤ថ្ងៃ គិតចាប់ពីថ្ងៃទី១ ខែកញ្ញា ដល់ថ្ងៃទី២៤ ខែកញ្ញា ឆ្នាំ២០១៨ មានគ្រោះថ្នាក់ចំនួន១៩៧លើក ស្លាប់ចំនួន៩៦នាក់ របួសសរុបចំនួន២៦២នាក់ របួសធ្ងន់១៩៨នាក់ របួសស្រាលចំនួន៦៤នាក់។
លទ្ធផលត្រួតពិនិត្យការអនុវត្តច្បាប់ចរាចរណ៍ ថ្ងៃទី២៤ ខែកញ្ញា ឆ្នាំ២០១៨ គិតពីម៉ោង១៤ ថ្ងៃទី២៣ ខែកញ្ញា ដល់ម៉ោង១៤ ថ្ងៃទី២៤ ខែកញ្ញា ឆ្នាំ២០១៨ រួមមាន៖ មធ្យោបាយចូលគោលដៅ ២.៥៥៧ គ្រឿង , មធ្យោបាយល្មើស ៣០៧គ្រឿង, អប់រំ ៩៥គ្រឿង , ពិន័យ ២១២គ្រឿង ៕ ដោយ ៖ បញ្ញាស័ក្តិ
