ខេត្តបន្ទាយមានជ័យ៖ ប្រធានសាខាកាំកុងត្រូលខេត្តបន្ទាយមានជ័យ គឺ លោក សាន វិជ្ជាសារ៉ាវុធ ត្រូវរងការរិះគន់ថា កំពុងមានរឿងអាស្រូវពុករលួយ និងដឹកនាំការងាររដ្ឋ មានបក្ខពួកនិយម។
ជាងនេះទៀត ក៏បានគាបសង្កត់មន្ត្រីក្រោមឱវាទ បណ្តេញមន្ត្រីមានក្របខណ្ឌឲ្យទៅធ្វើការពិនិត្យរទេះ និងឡានតាមផ្លូវរួចទៅជួលជនស៊ីវិលសាច់ញាតិរបស់ខ្លួនពីរនាក់ឲ្យមកធ្វើការជំនួសទៅវិញ។
មន្ត្រីថ្នាក់ទាបសាខាកាំកុងត្រូលខេត្តបន្ទាយមានជ័យមួយចំនួន បង្ហាញការមិនពេញចិត្ត ចំពោះទង្វើរបស់លោក សាន វិជ្ជាសារ៉ាវុធ ប្រធានសាខាកាំកុងត្រូល ខេត្តបន្ទាយមានជ័យ ថាបានរំលោភលើ ការងារទទួលខុសត្រូវ របស់ពួកគេ ដោយធ្វើការមិនបានអនុវត្តតាមប្រកាស របស់ក្រសួង និងមិនអនុវត្តតាមឋានានុក្រមនោះទេ។
ភាពអសកម្ម និងការបែកធ្លាយរឿងអាស្រូវពុករលួយ របស់លោកប្រធានសាខាកាំកុងត្រូល ខេត្តបន្ទាយមានខាងលើនេះ ត្រូវបានអគ្គនាយកកាំកុងត្រូលព្រមានដកបោះចោល កាលពីពេលថ្មីៗ។
ប្រភពពត៌មានពីមន្ត្រីកាំកុងត្រូលបានឲ្យដឹងថា សព្វថ្ងៃនេះ លោក សាន វិជ្ជាសារ៉ាវុធ បានរៀបយុទ្ធសាស្ត្រមួយខែ ចុះត្រួតពិនិត្យតាមផ្សារឲ្យបានពីរដង ដើម្បីធ្វើរបាយការណ៍ភូតកុហកថ្នាក់លើ។
សកម្មភាពទាំងនេះត្រូវបានគេដឹងថា គឺធ្វើឡើង ដើម្បីបិទបាំងរឿងអាស្រូវ ដែលក្រុមគាត់ បឋនបង្ក្រាបអ្នករកស៊ីតូចតាចឃុបឃិតជាមួយឈ្មួញធំៗ ឬក្រុមហ៊ុនធំៗ នាំចូលទំនិញផលិតផលខូចគុណភាពមានដូចជា ៖ បន្លែ ផ្លែឈើ ត្រី សាច់ សាច់មាន់ខូចគុណភាព និងប្រហិតគ្រប់ប្រភេទបង្កប់ក្នុងរទេះ ទំនិញនាំចូលពីថៃចូលមកកម្ពុជា តាមច្រកប៉ោយប៉ែតដើម្បីយកទៅលក់ចែកចាយបន្តតាមបណ្តាខេត្ត និងរាជធានីភ្នំពេញ។
កាលពីថ្ងៃទី២១ ខែកញ្ញា ឆ្នាំ២០១៨ លោក ម៉ក់ ពេជ្ជរិទ្ធ អគ្គនាយក នៃអគ្គនាយកដ្ឋានកាំកុងត្រូល បានធ្វើដំណើរពីរាជធានីភ្នំពេញ មកកាន់ច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដើម្បីបើកកិច្ចប្រជុំជាបន្ទាន់មួយ ជាមួយមន្ត្រីកាំកុងត្រូលនៅ ទីស្នាក់ការកាំកុងត្រូល ច្រកប៉ោយប៉ែត។
ប្រភពឲ្យដឹងថា កិច្ចប្រជុំនោះ លោក ម៉ក់ ពេជ្ជរិទ្ធ អគ្គនាយកកាំកុងត្រូល បានព្រមាន និងទុកពេលឲ្យ លោក សាន វិជ្ជាសារ៉ាវុធ ប្រធានសាខាកាំកុងត្រូល ខេត្ត បន្ទាយមានជ័យ មួយសប្តាហ៍ឲ្យធ្វើការកែប្រែឥរិយាបទ ឬរបៀបដឹកនាំការងារឲ្យបសនត្រឹមត្រូវ និងត្រូវចេះសាមគ្គីភាពគ្នាឡើងវិញ។ ជាពុសេសត្រូវផ្តល់ការងារឲ្យកូនចៅក្រោមឱវាទធ្វើការងារឲ្យស្របតាមឋានានុក្រម។
ប្រភពបន្តថា សព្វថ្ងៃនេះបទល្មើសខុសច្បាប់ ដែលឈ្មួញលួចបង្កប់ទំនិញខូចគុណភាពបានកើតមានពេញបន្ទុក។
ជាក់ស្តែងសមត្ថកិច្ចនៅតាមបណ្តាខេត្តមានដូចជា៖ ខេត្តបាត់ដំបង ពោធិ៍សាត់ កំពង់ឆ្នាំង និងកំពង់ធំ ជាដើម ចាប់បានសាច់មាន់ ប្រហិត និងទំនិញខូចគុណភាពជាច្រើនប្រភេទពីឈ្មួញ។
ប្រភពបានឲ្យដឹងថា ពេលសមត្ថកិច្ចចាប់បាប់បានទំនិញខូចគុណភាពឬាំងនោះ គឺឈ្មួញទាំងនោះបានឆ្លើយថា បាននាំចូលពីប្រទេសថៃ តាមច្រកប៉ោយប៉ែតជារហូត។
ប្រភពឲ្យដឹងទៀតថា កន្លងមក លោក សាន វិជ្ជាសារ៉ាវុធ ប្រធានសាខាកាំកុងត្រូល ខេត្តបន្ទាយមានជ័យ តែងមានអំនួត និងតាំងខ្លួនឯង គ្មាននរណាចេះដល់ទេ។ ជាងនេះ ក៏បានយកឈ្មោះអ្នកធំនេះ អ្នកធំនោះ មកប្រើប្រាស់ ដើម្បីគាបសង្កត់មន្ត្រីក្រោមឱវាទ។
ក្នុងនោះ លោកប្រធាន គាត់បានតាំងខ្លួនជាទីប្រឹក្សាផ្ទាល់ របស់ លោកឧបនាយករដ្ឋមន្ត្រី យឹម ឆៃលី មានឋានស្មើអគ្គនាយក។
មន្ត្រីកាំកុងត្រូលឲ្យដឹងទៀតថា ការយកឈ្មោះ អ្នកធំមកបាំងមុខនោះក៏ដើម្បីការពារអំពើអាក្រក់ឃុបឃិតជាមួយឈ្មួញដាក់ខែរាប់ក្បាលឡានដឹកទំនិញមួយគ្រឿង ១០០បាតមួយថ្ងៃ ដោយមានឡានប្រមាណពី៣០០ទៅ៥០០ ឡាន។ មានន័យថា ក្នុងមួយថ្ងៃ លោកប្រធានសាខាកាំកុងត្រូលខេត្តបន្ទាយមានជ័យ អាចរកចំណូលក្រោមតុ ពីឈ្មួញបានរាប់ម៉ឺនបាត។ ហើយថា ចំណូលទាំងនោះ លោក សាន វិជ្ជាសារ៉ាវុធ បានអះអាងនៅចំពោះមុខកូនចៅថា មួយចំនួនទុកដោះស្រាយអង្គភាព ហើយមួយចំនួនទៀត ទុកចិញ្ចឹមមេកើយ របស់ខ្លួន គឺរដ្ឋមន្ត្រីក្រសួងពាណិជ្ជកម្ម និងមួយចំនួនទៀតជួយទុកបក្ស។
ទោះជាបែបនេះក្តី មិនទាន់អាចទាក់ទង លោក សាន វិជ្ជាសារ៉ាវុធ ដើម្បីសុំការបំភ្លឺជុំវិញការចោទប្រកាន់ខាងលើបានទេ តាមទូរស័ព្ទ នៅរសៀលថ្ងៃចន្ទ ទី២៤ ខែកញ្ញា ឆ្នាំ២០១៨៕ ដោយ៖ ដែន សីមា