សូមប្រុងប្រយ័ត្ន នៅពេលអ្នកកំពុងសាកថ្មទូរស័ព្ទស្មាតហ្វូនរបស់អ្នក! ព្រោះតែថ្មីៗនេះ បុគ្គលិកធនាគារម្នាក់បានរងរបួសរលាកនៅលើដៃរបស់នាងគួរឲ្យអាសូរ បន្ទាប់ពីបានប៉ះវា ខណៈវាកំពុងសាកថ្មនៅផ្ទះរបស់នាង ស្ថិតនៅ Seksyen 7, Shah Alam ប្រទេសម៉ាឡេស៊ី កាលពីព្រឹកថ្ងៃអាទិត្យ (២៣ កញ្ញា) ។
យោងតាម Berita Harian ហេតុការណ៍ដ៏ពុំនឹកស្មាននេះបានកើតឡើងនៅវេលាម៉ោងប្រហែល ៤ និង ២០ នាទីទៀបភ្លឺ ហើយទូរស័ព្ទស្មាតហ្វូន ប៊ិះបង្កឲ្យភ្លើងឆាបឆេះនៅក្នុងផ្ទះរបស់នាងតែម្តង ខណៈវាត្រូវបានដាក់នៅលើពូករបស់នាង ដែលចាប់ផ្តើមឆេះងំ ។ ទូរស័ព្ទរបស់នាងបានឡើងកំដៅ ខណៈពេលសាកថ្ម ដែលជាមូលហេតុបង្កឲ្យនាង Nur Filzah Abdul Rahman អាយុ ២៤ ឆ្នាំ ត្រូវរបួសរលាកនៅដៃរបស់នាង ។
នាងនិយាយថា៖ «ខ្ញុំតែងសាកថ្មទូរស័ព្ទរបស់ខ្ញុំ មុនចូលគេង ហើយជាធម្មតា ខ្ញុំបានដាក់វានៅលើឥដ្ឋា ។ ទោះយ៉ាងណា នៅយប់នោះ ខ្ញុំបានសម្រេចដាក់វានៅលើពូក នៅផ្នែកខាងឆ្វេងដៃរបស់ខ្ញុំ មុនពេលខ្ញុំចូលគេង ខណៈវាកំពុងសាក ។ ខ្ញុំបានភ្ញាក់ឡើងនៅវេលាម៉ោង ៤ និង២០ នាទីព្រឹក នៅពេលនោះ ខ្ញុំមានអារម្មណ៍ថាអ្វីៗក្តៅ នៅខាងក្រោយខ្លួនរបស់ខ្ញុំ ។ ខ្ញុំប្រែខ្លួនទៅឆ្វេង ហើយនៅពេលនោះ ដៃរបស់ខ្ញុំបានប៉ះទូរស័ព្ទរបស់ខ្ញុំដោយចៃដន្យ ដែលបណ្តាឲ្យឈឺផ្សារយ៉ាងខ្លាំងតែម្តង» ។
ភ្លាមៗនោះ នាងបានក្រោកឡើងបើកភ្លើង ដើម្បីពិនិត្យស្ថានភាពបន្ទប់របស់នាង ។ នាងពិតជាសន្ធត់ណាស់ ខណៈឃើញបន្ទប់ពោរពេញទៅដោយផ្សែង ហើយពូករបស់នាងកំពុតត្រូវឆេះ ដោយសារទូរស័ព្ទដែលក្តៅបង្កឡើង ។ ភ្លាមៗនោះ នាងបានដាស់អ្នកជិតខាងនាងឲ្យជួយ ហើយនៅពេលពួកគេបានឃើញពូករបស់នាងកំពុងឆេះងំ ពួកគេបានយកធុងទឹកចាក់ទៅលើគ្រែ ដើម្បីពន្លត់ភ្លើង ។
បន្ទាប់មក ពួកគេបាននាំយក Nur Filzah ទៅកាន់មន្ទីរពេទ្យ ដើម្បីព្យាបាលរបួសរលាកដៃរបស់នាង ។ នាងបានប្រាប់ Harian Metro ថា នាងកំពុងទូរស័ព្ទស្មាតហ្វូនដដែលនេះ អស់រយៈពេល ៤ ឆ្នាំ មកហើយ ដោយពុំមានបញ្ហាអ្វីណាមួយនោះទេ ប៉ុន្តែ ទើបតែប្តូរថ្ម១លើកដំបូងប៉ុណ្ណោះ កាលពី២ខាងមុននេះ ។
ទោះយ៉ាងណា នាងគ្រាន់តែរងរបួសស្រាលប៉ុណ្ណោះ ។ នាងនិយាយថា នាងពិតសំណាងណាស់ ដែលពុំមានអ្វីអាក្រក់កើតឡើងចំពោះរូបនាង ៕ ចន្ទី (ប្រភព៖ worldofbuzz)
