ភ្នំពេញ៖ ឆ្លើយតបនឹងសមាគម គ្រូបង្រៀនកម្ពុជាឯករាជ្យ ដែលគ្រោងនឹងជួបជុំគ្នានៅសួនច្បារវត្តភ្នំ និងបន្តហែក្បួន ដាក់ញត្តិ ជូនក្រសួង អប់រំ យុវជន និង កីឡា និង ខុទ្ទកាល័យ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជានៅ ថ្ងៃទី៥ ខែតុលា ឆ្នាំ២០១៨ខាងមុខនេះ ដើម្បីលើកឡើងពីស្ថានភាព គ្រូបង្រៀន និងគុណភាពគ្រូបង្រៀននៅក្នុងប្រទេសកម្ពុជានោះ រដ្ឋបាលរាជធានីភ្នំពេញ មិនអនុញ្ញាត ឲ្យមានការជួបជុំ និងហែរក្បួននេះឡើយ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ នៅព្រឹកថ្ងៃទី២៥ កញ្ញានេះ បានបញ្ជាក់ថា រដ្ឋបាលរាជធានីភ្នំពេញ គឺមិនបានអនុញ្ញាត ទៅតាមអ្វី ដែលមាននៅក្នុង លិខិតស្នើសុំ របស់សមាគមគ្រូបង្រៀនកម្ពុជាឯករាជ្យនោះទេ ។ លោកអ្នកនាំពាក្យ បានមានប្រសាសន៍ថា “ពួកគាត់ អាចជួបជុំគ្នាបាន តែនៅទីលានប្រជាធិបតេយ្យ តែចំពោះការហែក្បួន គឺមិនអនុញ្ញាតនោះទេ ដោយវាធ្វើឲ្យប៉ះពាល់ដល់សណ្តាប់ធ្នាប់សាធារណៈ និងបង្កការកកស្ទះចរាចរ ដល់ប្រជាពលរដ្ឋ ដែលធ្វើដំណើរ នៅក្នុងរាជធានីភ្នំពេញ ដូច្នេះរដ្ឋបាលរាជធានីភ្នំពេញមិនអនុញ្ញាតឡើយ” ។
លោក ម៉េត មាសភក្តី បានបញ្ជាក់ឲ្យដឹងទៀតថា ទាក់ទងនឹងការហែក្បួន ដាក់ញតិ្តនេះ រដ្ឋបាលរាជធានី មិនអនុញ្ញាតជូននោះទេ រួមទាំងការងារជួបជុំ នៅសួនច្បារវត្តភ្នំ ព្រោះថាទីតាំងសួនច្បារនេះ មិនមែនជាកន្លែងដែលសម្តែងមតិនោះទេ ។ ដោយឡែក ការងារហែក្បួន ដើម្បីដាក់ញតិ្តនេះ ក៏មិនអនុញ្ញាតជូនដែរ ព្រោះវាប៉ះពាល់ ដល់សណ្តាប់ធ្នាប់សាធារណៈ បង្កើនការកក់ស្ទះ ។ ដូច្នេះការហែក្បួន មិនត្រូវអនុញ្ញាតជូនទេ ប៉ុន្តែពួកគេអាចចាត់តំណាង របស់គាត់ប៉ុន្មាននាក់ យកញតិ្ត ទៅដាក់នៅតាមទីតាំង ដែលគាត់ចង់ដាក់បាន ហើយសម្រាប់ទីតាំង ដែលយើងអាច អនុញ្ញាតឲ្យជួបជុំ គឺយើងអាចប្រើទីលានប្រជាធិបតេយ្យ ព្រោះនេះ ត្រូវបានកំណត់ដោយច្បាប់ ថាជាកន្លែងទុកសម្រាប់ បងប្អូនយើងសម្តែងមតិ ។
លោក ម៉េត មាសភក្តី បានបញ្ជាក់យ៉ាងខ្លីថា “ការឆ្លើយតបនេះ គឺជាជំហររបស់ លោក ឃួង ស្រេង អភិបាលរាជធានីភ្នំពញ”។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានអះអាងថា ក្នុងញតិ្តនោះ មានគោលបំណង ទាមទារជាថ្មីម្តងទៀត ឲ្យក្រសួងនិងសម្តេចនាយករដ្ឋមន្ត្រី ហ៊ុន សែន ផ្តល់ ប្រាក់ខែគោលដល់លោកគ្រូ អ្នកគ្រូ យ៉ាងតិច២លានរៀលក្នុងមួយខែ។
ចំណែកលោករ៉ុង ឈុន ជាអតីតប្រធានសមាគមគ្រូបង្រៀនកម្ពុជាឯករាជ្យ បានអំពាវនាវដល់លោកគ្រូ អ្នកគ្រូ សិស្យ និស្សិត យុវជន និងប្រជាពលរដ្ឋ សូមចូលរួមទិវាគ្រូបង្រៀនពិភពលោក នៅថ្ងៃទី៥ ខែតុលា នេះ ឲ្យបានច្រើនកុះករ ។
សមាគមគ្រូបង្រៀនកម្ពុជាឯករាជ្យ បានធ្វើលិខិតជូនដំណឹង ទៅសាលារាជធានីភ្នំពេញ ស្តីពីការរៀបចំប្រារព្ធទិវាគ្រូបង្រៀនពិភពលោក នៅថ្ងៃទី៥ ខែតុលា ឆ្នាំ២០១៨ ខាងមុខនេះ នៅសួនច្បារវត្តភ្នំ ដោយមានការចូលរួមចំនួន ១៥០នាក់។
យោងតាមលិខិតរបស់លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ដាក់ទៅលោកឃួង ស្រេង អភិបាល នៃគណៈអភិបាលរាជធានីភ្នំពេញ កាលពីថ្ងៃទី២១ ខែកញ្ញា បានឲ្យដឹងថា សមាគមគ្រូបង្រៀនកម្ពុជាឯករាជ្យ នឹងរៀបចំប្រារព្ធទិវាគ្រូបង្រៀនពិភពលោក ដែលប្រព្រឹត្តទៅនៅថ្ងៃទី៥ ខែតុលា ឆ្នាំ២០១៨ នៅវេលាម៉ោង៨ព្រឹក នៅសួនច្បារវត្តភ្នំ។ ទិវាគ្រូបង្រៀនពិភពលោកឆ្នាំនេះ លើកយកប្រធានបទ “សិទ្ធិទទួលបានការអប់រំ និងសិទ្ធិទទួលបានគ្រូបង្រៀនមានគុណភាព” និងមានការចូលរួមសមាជិក សមាជិកាសមាគម លោកគ្រូ អ្នកគ្រូ យុវជន សិស្ស និស្សិត សហជីព អង្គការសង្គមស៊ីវិល អន្តរជាតិ និងប្រជាជនសរុបយ៉ាងតិច ១៥០នាក់។
លោកស្រី អ៊ុក ឆាយ៉ាវី បានបញ្ជាក់ថា ពិធីអបអរទិវាគ្រូបង្រៀនពិភពលោក នឹងដង្ហែក្បួនចេញពីសួនច្បារវត្តភ្នំ ដើម្បីដាក់ញត្តិជូនក្រសួងអប់រំ យុវជន និងកីឡា និងខុទ្ទកាល័យនាយករដ្ឋមន្ត្រី បន្ទាប់មកពីធីនេះ នឹងប្រកាសបិទ៕ ដោយ ៖ កូឡាប