តាកែវ ៖ ថ្លែងនៅក្នុងពិធីកាត់ខ្សែបូរណ៏សម្ភោធដាក់អោយប្រើប្រាស់នៅអាគារមណ្ឌលផ្តល់ឈាម និងមន្ទីរពិសោធន៍វេជ្ជសាស្ត្រ នៃមន្ទីរពេទ្យបង្អែកខេត្តតាកែវនាព្រឹកថ្ងៃទី ២៥ ខែកញ្ញា ២០១៨នេះ ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលបានធ្វើការជម្រុញអោយក្រុមគ្រូពេទ្យបន្តខិតខំប្រឹងប្រែង និងយកចិត្តទុកដាក់បំរើសេវាសុខាភិបាលជូនដល់ពលរដ្ឋ ពិសេសពលរដ្ឋក្រីក្រ តែម្តង ។
ការជម្រុញនេះគឺគ្រាន់តែជាការក្រើនរំលឹកដល់មន្ត្រីសុខាភិបាល យើងត្រូវប្រើប្រាស់ឲ្យអស់លទ្ធភាព នូវចំណេះដឹង និងចំណេះធ្វើរបស់ខ្លួន ដោយអនុវត្តឲ្យបាន ខ្ជាប់ខ្ជួន និងត្រឹមត្រូវតាមក្រមសីលធម៌វិជ្ជាជីវៈជាគ្រូពេទ្យ នូវរាល់ពេលបំពេញកតព្វកិច្ចសង្គ្រោះ ថែទាំអាយុជីវិតប្រជាជនយើង ដោយអនុវត្ត តាមអនុសាសន៍ និងការណែនាំដ៏ថ្លៃថ្លារបស់ប្រមុខរាជរដ្ឋាកម្ពុជា គឺ “ត្រូវផ្ដល់សេវាសិនចាំគិតគូរការបង់ថ្លៃ សេវា ជាក្រោយ” ។
ឆ្លៀតក្នុងឱកាសនោះដែរ ឯកឧត្តមវេជ្ជបណ្ឌិត ម៉ម ប៊ុនហេង បានសម្ដែងនូវអំណរអរគុណយ៉ាងជ្រាលជ្រៅ ដល់ប្រជាពលរដ្ឋអាមេរិក ដែលបានផ្ដល់អាគារ ដ៏មានសារៈសំខាន់នេះ ដែលជាគុណប្រយោជន៍ ដល់ប្រជាជនក្នុងខេត្តតាកែវ ក្នុងការទទួលបាន សេវាផ្ដល់ឈាមគ្រប់គ្រាន់ ដើម្បីជួយសង្គ្រោះអាយុជីវិតពលរដ្ឋ បានទាន់ពេលវេលា ។ ហើយជំនួយមួយនេះ គឺបានឆ្លើយតបទៅ និងសេចក្ដីត្រូវកាជាចាំបាច់របស់ប្រជាជនកម្ពុជា ជាពិសេសប្រជាជនក្នុង ខេត្តតាកែវ និងតំបន់ជុំវិញ ស្របតាមយុទ្ធសាស្ត្រ របស់ក្រសួងសុខាភិបាលផងដែរ។
គួរបញ្ជាក់ផងដែរថានៅក្នុងខេត្តតាកែវយើង មានមន្ទីរពេទ្យបង្អែក មណ្ឌលសុខភាព ប៉ុស្ដិ៍សុខភាព អគារសម្ភព ដែលបានដាក់ឲ្យប្រើប្រាស់រហូត ដល់ទីជនបទដាច់ស្រយ៉ាល ។ ហើយអគារមជ្ឈមណ្ឌលឈាម ដែលសម្ភោធដាក់ឲ្យប្រើប្រាស់និងចំណាយថិវការអស់ ជាង៨០ម៉ឺនដុល្លារនេះ គឺជាសមិទ្ធិផលថ្មីមួយបន្ថែមទៀត ដើម្បីបម្រើសេវាជួយសង្គ្រោះបន្ទាន់ដល់អ្នកជម្ងឺផ្សេងៗ ដែលត្រូវការ ឈាមពិសេសជួយសង្គ្រោះស្ដ្រី និងកុមារ ក្នុងនោះគឺការកាត់បន្ថយអត្រាឈឺ អត្រាស្លាប់របស់មាតា ទារក និងកុមារផងដែរ ។
ទទឹមនិងនោះដែរឯកឧត្តមរដ្ឋមន្ត្រីបានសម្ដែងនូវក្ដីសង្ឃឹមយ៉ាងមុតមាំថា អាគារផ្ដល់ឈាម និងមន្ទីរពិសោធន៍នេះ ចាប់ពីពេលបើកដំណើរការនេះតទៅ ពិតណាស់ និងអាចជួយសំរាលការលំបាកមួយកម្រិតធំ ដល់ប្រជាពលរដ្ឋយើងក្នុងតំបន់នេះ ក្នុងការស្វែងរកទទួលសេវាផ្ដល់ឈាម យ៉ាងទូលំទូលាយ៕ តាកែវ
