ភ្នំពេញ៖ ដើម្បីអបអរថ្ងៃប្រារព្ធខួបបេតិកភណ្ឌអឺរ៉ុបថ្ងៃទី២៩ ខែកញ្ញា ក្រសួងវប្បធម៌ និងវិចិត្រសិល្បៈ បានបើកឱ្យសាធារណជនទាំងអស់ ចូលទស្សនា និងសិក្សាឈ្វេងយល់ កន្លែងទុកវត្ថុបុរាណដែលរក្សាទុក នៅអភិរក្សដ្ឋានអង្គរ នៅថ្ងៃទី២៩ ខែកញ្ញាខាងមុខនេះ ចាប់ពីម៉ោង ៨ព្រឹក ដល់ម៉ោង ៤រសៀល។ អភិរក្សដ្ឋានអង្គរ មានទីតាំងស្ថិតនៅតាមបណ្ដោយមាត់ស្ទឹងសៀមរាប ឬនៅមុខវត្តព្រះឥន្ទកោសីយ៍(វត្តលើ)ស្ថិតនៅក្នុងសង្កាត់ស្លក្រាម ក្រុងសៀមរាប។
ប្រជាពលរដ្ឋជាពិសេសយុវជន អាចឈ្វេងយល់អំពីបេតិកភណ្ឌជាតិ និងការងាររបស់រាជរដ្ឋាភិបាល អាជ្ញាធរខេត្តគ្រប់លំដាប់ថ្នាក់ និងសមត្ថកិច្ច ដែលបានខំប្រមូលការពារ និងថែរក្សាសុវត្ថិភាពវត្ថុសិល្បៈ ក្នុងឃ្លាំងអភិរក្សដ្ឋានអង្គរ រហូតមកដល់សព្វថ្ងៃនេះ ហើយប្រជាពលរដ្ឋដែលធ្លាប់បានប្រគល់វត្ថុបុរាណផ្សេងៗ មកអភិរក្សដ្ឋានអង្គរ ក៏អាចមកពិនិត្យបានថា វត្ថុទាំងនោះមានការរក្សាទុកត្រឹម ត្រូវ ឬមានសភាពដូចដើមឬអត់។ បច្ចុប្បន្ននេះនៅក្នុងអភិរក្សដ្ឋានអង្គរ មានវត្ថុបុរាណដែលប្រមូលមកពីបណ្តា ខេត្តទាំងអស់នៅទូទាំងប្រទេសយកមករក្សា ទុកនៅទីនេះ មានប្រមាណជិត១ម៉ឺនវត្ថុបុរាណ ក្នុងនោះមានចម្លាក់ថ្ម និងចម្លាក់ឈើ។
នៅក្នុង១ឆ្នាំ ក្រសួងវប្បធម៌និងវិចិត្រសិល្បៈ បានបើក ទូលាយឱ្យសាធារណជនទូទៅ បានចូលទស្សនា និងសិក្សាឈ្វេងយល់ ពីវត្ថុបុរាណដែលរក្សា ទុកនៅអភិរក្សអង្គរនេះ ចំនួន២ដង គឺនៅថ្ងៃទី២៩ ខែកញ្ញានេះម្តង និងនៅខែមេសា ក្នុងឱកាសចូលឆ្នាំខ្មែរម្តង។ ក្រៅពីនេះ ថ្ងៃធម្មតាក៏ប្រជាពលរដ្ឋ អាចចូលសិក្សាឈ្វេងយល់ពី វត្ថុបុរាណបានផងដែរ ដោយប្រជាពលរដ្ឋ គ្រាន់តែស្នើសុំទៅមន្ត្រី ដែលការពារនៅទីនោះប៉ុណ្ណោះ ដោយគ្មានការចំណាយថវិកាអ្វីទេ។ នៅពេលប្រជាពលរដ្ឋ ដែលចូលទៅទស្សនាវត្ថុបុរាណទាំងនេះ អាចកត់ត្រា ឬសួរបន្ថែមបាន ព្រោះនៅក្នុងអភិរក្សដ្ឋានអង្គរនេះ មានមន្ត្រីជំនាញសម្រាប់ពន្យល់ ដល់ប្រជាពលរដ្ឋ ឱ្យបានយល់ពីប្រវត្តិ នៃរូបចម្លាក់នីមួយៗ៕ ដោយ ៖ បញ្ញាស័ក្តិ
