បន្ទាប់ធ្វើដំណើរតែឯងជិត ២ ខែ យុវជនជនជាតិឥណ្ឌូនេស៊ីអាយុ ១៩ ឆ្នាំ នៅទីបំផុត បានវិលត្រឡប់មកផ្ទះវិញដោយសុវត្ថិភាព ជាមួយគ្រូសាររបស់គាត់ ។
ការធ្វើដំណើររសាត់អណ្តែតដ៏មិននឹកស្មានដល់នេះ បានចាប់ផ្តើមនៅក្នុងពាក់កណ្តាលខែកក្កដា ចម្ងាយប្រហែល ១២៥ គីឡូម៉ែត្រ ពីភាគខាងជើងជ្រោយ Manado ជាកន្លែងដែលយុវជនឈ្មោះ Aldi Novel Adilang កំពុងធ្វើការជាអ្នកចាំមើលអំពូលភ្លើងទៅលើអន្ទាក់ត្រីអណ្តែត ។
Adilang ត្រូវបានជួលដើម្បីចំណាយពេល ៦ ខែ នៅលើខ្ទមឈើដែលអ្នកស្រុកជាទូទៅហៅថា «rompong» ដើម្បីបំភ្លឺចង្កៀងដំណើរការដោយម៉ាស៊ីនភ្លើង ដើម្បីទាក់ទាញ និងទាក់ត្រីនៅពេលយប់ ។ នៅឆ្ងាយពីឆ្នេរសមុទ្រ បណ្តា rompong ត្រូវបានភ្ជាប់ទៅនឹងគ្រឹះបេតុងនៅលើបាតសមុទ្រ ដោយខ្សែ ។
នៅទីតាំងដាច់ស្រយាលបែបនេះ Adilang ត្រូវបានមនុស្សមកពីក្រុមហ៊ុនរបស់គាត់ មកជួបរៀងរាល់១សប្តាហ៍ម្តង ដើម្បីផ្គត់ផ្គង់ដូចជាទឹក, អាហារ និងប្រេងឥន្ធនៈ ។ ហើយបន្ទាប់មក ពួកគេក៏បានប្រមូលផលត្រីត្រឡប់ទៅវិញផងដែរ ។
ជាអកុសល ថ្ងៃមួយ ស្រាប់តែមានខ្យល់បោកបក់ខ្លាំង បង្កឲ្យកើតមានរលកធំៗ ដែលបានធ្វើឲ្យដាច់ខ្សែពីយុថ្កា ធ្វើឲ្យ Adilang ត្រូវរសាត់អណ្តែតលើសមុទ្រជាមួយខ្ទមរាប់សិបម៉ៃល៍តែម្តង ។
Adilang បានគ្រប់គ្រងទំនាក់ទំនងជាមួយមិត្តៗភក្តិ នៅលើខ្ទមក្នុងរយៈពេលសប្តាហ៍ដំបូង ខណៈរូបគេនៅតែឯង នៅក្នុងដំណើររសាត់រណ្តែតគ្មានគោលដៅនៅលើផ្ទៃសមុទ្រ ។
នៅពេលអស់ស្បៀងអាហារផ្គត់ផ្គង់ប្រចាំថ្ងៃ រូបគេបានចាប់ផ្តើមចាប់ត្រី និងចម្អិនពួកវាដោយប្រើប្រាស់អុស ។ ហើយដើម្បីផឹកទឹក រូបគេបានច្រោះទឹកសមុទ្រប្រៃតាមរយៈសម្លៀកបំពាក់ ។
Adilang បានធ្វើដំណើរឆ្លងកាត់កប៉ាល់ជាង ១០ ប៉ុន្តែ ពុំមាននរណាម្នាក់ចាប់អារម្មណ៍ការអំពាវនាវឲ្យជួយរបស់គាត់នោះទេ ។ ក្នុងឱកាសជាច្រើន គាត់ក៏បានគិតលោតចូលសមុទ្រ ដើម្បីភាពវេទនារបស់ខ្លួន ។
ទោះយ៉ាងណា ពាក្យពេចន៍ផ្តាំផ្ញើពីឪពុកម្តាយរបស់គាត់ បានធ្វើឲ្យគាត់នឹកឃើញថា៖ នៅពេលអស់សង្ឃឹម ចូរកូនបន់ស្រន់ទៅ ។
ភ្ជាប់ជាមួយជំនាញខាងព្រះគម្ពីរ និងការរស់រានមានជីវិតរបស់គាត់ នៅទីបំផុត ថ្ងៃទី៣១ សីហា Adilang ត្រូវបានរកឃើញដោយកប៉ាល់ដទៃ ។
Adilang គ្រប់គ្រងទាក់ទាងជាមួយកប៉ាល់ឆ្លងកាត់១គ្រឿងឈ្មោះ MV Arpeggio តាមរយៈវិទ្យុមួយដែលផ្តល់ដោយមិត្តភក្តិម្នាក់ ។ គាត់បានស្រែកយំថា៖ «ជួយខ្ញុំផងៗ!!» ។
ទីបំផុត កប៉ាល់ Arpeggio បានជួយសង្គ្រោះ Adilang ដោយជោគជ័យ នៅក្នុងប្រតិបត្តិការសង្គ្រោះដ៏លំបាកមួយ ។
Arpeggio បានទៅកាន់កំពង់ផែ Tokuyama នៅខេត្ត Yamaguchi ប្រទេសជប៉ុន នៅថ្ងៃទី៦ កញ្ញា ។ នៅពេលមកដល់លើគោកវិញ Adilang ត្រូវបានត្រួតពិនិត្យដោយឆ្មាំសមុទ្រជប៉ុន និងកំណត់សុខភាពឲ្យវិលត្រឡប់មកស្រុកកំណើតវិញ ។
ស្ថានកុងស៊ុលឥណ្ឌូនេស៊ី នៅក្នុង Osaka បានសម្របសម្រួលជាមួយជើងហោះហើរមួយ ដើម្បីបញ្ជូនគាត់វិលត្រឡប់មកកាន់ប្រទេសឥណ្ឌូនេស៊ីវិញ ក្នុងរយៈពេល២ថ្ងៃក្រោយមក ។
សូមបញ្ជាក់ថា កម្មករជនជាតិឥណ្ឌូនេស៊ីអាយុ ១៩ ឆ្នាំ រូបនេះ បានរសាត់អណ្តែតនៅលើផ្ទៃសមុទ្រដោយក្តីអស់សង្ឃឹមរយៈពេល ៤៩ ថ្ងៃ ៕ ឧត្តម (ប្រភព៖ nextshark)
