ត្រីដូហ្វីនដ៏ឆ្លាតមួយក្បាល ត្រូវបានគេទុកចោល នៅក្នុងអាងដែលត្រូវគេបោះបង់ចោល ដោយសារតែគ្មានអ្នកទិញសំបុត្រចូលមើល ហើយត្រីនោះមើលទៅកំសត់ណាស់។
ដោយសារតែការទិញសំបុត្រមិនសូវមាន ធ្វើឲ្យសួនកំសាន្ត Marine Park ស្ថិតក្នុងតំបន់ Choshi ប្រទេសជប៉ុន ត្រូវបានបិទ បណ្តាលឲ្យសត្វទាំងអស់ត្រូវគេទុកចោល។
មិនត្រឹមតែត្រីដូហ្វីនមួយក្បាលឈ្មោះ Honey ទេ សត្វផេនឃ្វីនចំនួន ៤៦ក្បាល និងប្រភេទត្រី ព្រមទាំងល្មូនរាប់រយក្បាលទៀតក៏ត្រូវគេទុកចោលក្នុងទ្រុងរៀងៗខ្លួនដែរ ចាប់តាំងពីសួនកំសាន្តនោះត្រូវគេបិទចោល កាលពី ៩ខែមុន។
ទោះយ៉ាងណា នៅមានបុគ្គលិកមួយចំនួនស្នាក់នៅទីនោះដើម្បីមើលថែពួកវា។
បច្ចុប្បន្ន គំរោងត្រីដូហ្វីន (Dolphin Project) កំពុងព្យាយាមជួយសង្គ្រោះ Honey និងដាក់
ឲ្យនាងចូលនិវត្តន៍ ឬក៏វាយតម្លៃពីលទ្ធភាពក្នុងការប្រលែងនាងឲ្យចូលសមុទ្រវិញ ប៉ុន្តែគំរោងនោះកំពុងត្រូវជាប់គាំង ដោយសារតែម្ចាស់របស់នាងមិនមានការឆ្លើយតប។
បើតាមការបញ្ជាក់របស់សាក្សីម្នាក់បានឲ្យដឹងថា ត្រីដូហ្វីនឈ្មោះ Honey បណ្តែតខ្លួននៅលើទឹកអស់ជាង ២ម៉ោង នៅក្នុងអាងដែលគ្មានអ្វីទាំងអស់ មានតែស្រមោលនាង ៕ សុភ័ក្ត្រ
