តាកែវ ៖ មន្ត្រីជាន់ខ្ពស់ក្រសួងបរិស្ថាន បានចាត់ទុកយុវជនគឺជាកម្លាំងចលករដ៏សំខាន់ និងមានប្រសិទ្ធិភាពបំផុតក្នុងការចូលរួមចំណែកលើការផ្សព្វផ្សាយ ពីការប្រែប្រួលអាកាសធាតុដល់បងប្អូនប្រជាពលរដ្ឋមានការយល់ដឹងពីអាកាសធាតុកាន់តែទូលំទូលាយថែមទៀត ។
ថ្លែងនៅចំពោះមុខក្រុមយុវជនប្រមាណជាង២០០នាក់ ដែលបានចូលរួមនៅក្នុងសិក្ខាសាលាស្តីពីការប្រែប្រួលអាកាសធាតុសម្រាប់យុវជនខេត្តតាកែវ ដែលរៀបចំឡើងដោយក្រសួងបរិស្ថានរយៈពេល២ថ្ងៃ ចាប់ពីថ្ងៃទី២៥ដល់ថ្ងៃទី២៦ខែកញ្ញា ឆ្នាំ២០១៨ នៅឯសណ្ធាគារអាលីសវិឡា ស្ថិតនៅក្រុងដូនកែវ ខេត្តតាកែវ លោក ម៉ា ច័ន្ទសទ្ធា ប្រធាននាយកដ្ឋានរដ្ឋបាល ផែនការ និងហិរញ្ញវត្ថុ នៃអគ្គលេខាធិការដ្ឋានក្រុមប្រឹក្សាជាតិ អភិវឌ្ឍដោយចីរភាព បានមានប្រសាសន៍ថា ជាការពិតណាស់ ការចូលរួម និងការយល់ដឹងពីសំណាក់ក្រុមយុវជនតាមរយៈសិក្ខាសាលាប្រែប្រួលអាកាសធាតុនេះ វាពិតជាមានសារៈសំខាន់ខ្លាំងណាស់ ដែលអាចឲ្យយុវជនបានយល់ដឹងកាន់តែច្បាស់ពីកត្តាអ្វីខ្លះដែលនាំឲ្យមានការប្រែប្រួលអាកាសធាតុ និងវិធានការទប់ស្កាត់ចំពោះការប្រែប្រួលអាកាសធាតុ ពិសេសលើការងារអប់រំផ្សព្វផ្សាយដល់មហាជន ។
លោក ម៉ា ច័ន្ទសទ្ធា បន្តថា តាមរយៈការចូលរួមសិក្ខាសាលានេះ យុវជននឹងចូលរួមយ៉ាងសកម្មនិងផុលផុសថែមទៀត ពិសេសគឺអាចជួយបំពេញការងារផ្សព្វផ្សាយ និងការសិក្សាស្រាវជ្រាវបន្ថែមពីបញ្ហានៃការប្រែប្រួលអាកាសធាតុ ពិសេសសកម្មភាពកាត់បន្ថយឧស្ម័នផ្ទះកញ្ចក់ ដែលត្រូវតែចូលរួមឲ្យប្រជាពលរដ្ឋមានការយល់ដឹងកាន់តែច្បាស់ថែមទៀត និងចូលរួមទាំងអស់គ្នា ។
ជាមួយគ្នានេះដែរ លោក ម៉ា ច័ន្ទសទ្ធា ក៏បានធ្វើការលើកទឹកចិត្តដល់យុវជនទាំងអស់ ត្រូវប្រកាន់ភ្ជាប់នូវឥរិយាបទឧស្សាហ៍ព្យាយាមសិក្សារៀនសូត្រ និងជាពិសេសចូលរួមស្វែងយល់ឲ្យបានស៊ីជម្រៅពីបញ្ហានៃការប្រែប្រួលអាកាសធាតុ ដែលជាបញ្ហាចម្បងមួយរបស់ពិភពលោក នាស.វទី២១នេះ ហើយប្រែក្លាយឧបសគ្គឲ្យទៅជាកាលានុវត្តភាពមួយសម្រាប់អភិវឌ្ឍប្រទេសជាតិឲ្យកាន់តែរឹងមាំ និងប្រកបដោយភាពធន់នឹងការប្រែប្រួលអាកាសធាតុទៅថ្ងៃអនាគត់ ។
យុវតី ភេន គីមស្រ៊ុន បានបង្ហាញចំណាប់អារម្មណ៍ថា សិក្ខាសាលានេះ វាពិតជាធ្វើឲ្យយុវជនកាន់តែយល់ដឹងច្បាស់អំពីបញ្ហា និងផលប៉ះពាល់នៃការប្រែប្រួលអាកាសធាតុ ក៏ដូចជាវិធានការនៃការទប់ស្កាត់ពីការកាប់បំផ្លាញព្រៃឈើ ដែលកើតចេញពីសកម្មភាពរបស់មនុស្សនាំឲ្យខូចបរិស្ថាន ពិសេសនោះខ្ញុំនឹងប្តេជ្ញា និងធ្វើការផ្សព្វផ្សាយពីការការពារបរិស្ថាននេះឲ្យកាន់តែទូលំទូលាយដល់មិត្តភ័ក្ត បងប្អូន ក៏មហាជនទូទៅឲ្យយល់ដឹងកាន់តែច្បាស់ពីបរិស្ថាន និងនាំគ្នាចូលរួមទប់ស្កាត់ ការពារនូវបរិស្ថាននៅក្នុងប្រទេសរបស់យើងឲ្យល្អស្អាត ៕ តាកែវ
