បុរសនអាយុ ៣៦ ឆ្នាំ ម្នាក់ត្រូវបានចាប់ខ្លួនពីបទសម្លាប់ក្មេងប្រុសអាយុ ១០ ឆ្នាំ នៅឯសាលាបឋមសិក្សាមួយ ស្ថិតនៅភាគខាងកើតនៃប្រទេសចិន បន្ទាប់ពីក្មេងប្រុសនោះត្រូវបានចោទប្រកាន់ថា បានវាយភ្នែកកូនស្រីរបស់បុរសនេះ ក្នុងអំឡុងពេលនៅក្នុងថ្នាក់រៀនរបស់ពួកគេ ។
កាសែត South China Morning Post បានរាយការណ៍ឲ្យដឹងថា ហេតុការណ៍ដ៏រន្ធត់នេះបានកើតឡើងនៅសាលាបឋមសិក្សា Longshan ក្នុងទីក្រុង Wenzhou ខេត្ត Zhejiang កាលពីរសៀលថ្ងៃសុក្រ ។
ខណៈពេលកំពុងកាន់កាំបិតផ្លែឈើមួយនៅនឹងដៃ បុរសមិនស្គាល់ម្នាក់បានចូលទៅក្នុងសាលារៀន ក្នុងបំណងចង់សងសឹក ហើយភ្លាមៗនោះ បានរកមើលក្មេងប្រុសម្នាក់ដែលធ្វើឲ្យកូនស្រីរបស់គាត់ឈឺចាប់ភ្នែក ។
អាជ្ញាធរបាននិយាយថា ជនដៃដល់បាននិយាយថា កូនស្រីរបស់គាត់បានឈឺចាប់ភ្នែក បន្ទាប់ពីមានជម្លោះគ្នាជាមួយក្មេងប្រុសម្នាក់ នៅឯសាលាកាលពីថ្ងៃពុធ ។ បុរសនោះបានផ្ទុះកំហឹងទៅលើក្មេងប្រុសនោះ និងក៏បាននាំយកកាំបិតផ្លែឈើទៅកាន់សាលារៀន ដើម្បីសងសឹក និងធ្វើឲ្យក្មេងនោះឈឺចាប់វិញម្តង ។
ប៉ូលីសបានរកឃើញសាកសពក្មេងរងគ្រោះ ដេកនៅលើកម្រាលឥដ្ឋបន្ទប់ទឹកទាំងថ្លុកឈាម ខណៈបុរសនោះជក់បារីក្បែរសាកសព ជាមួយអាវុធនៅក្បែរនោះផងដែរ ។ នេះបើយោងតាម Sina ។
ក្មេងប្រុសរងគ្រោះត្រូវបានរាយការណ៍ឲ្យដឹងថា រងរបួសដោយផ្លែកាំបិតច្រើនកន្លែងនៅលើដងខ្លួន និងដាច់ក ។
មុនពេលហេតុការណ៍ដ៏រន្ធត់នេះ កើតឡើង ឪពុកម្តាយរបស់ក្មេងទាំងសងខាង បានឈានដល់ចំណុចសម្របសម្រួលគ្នាមួយកាលពីថ្ងៃពុធ បន្ទាប់ពីបានរកឃើញនូវអ្វីដែលបានកើតឡើងនៅក្នុងថ្នាក់រៀន តាមរយៈ WeChat ។ ភាគីទាំងពីរបានយល់ព្រមថា ក្មេងប្រុសនោះនឹងសុំទោសក្មេងស្រីនៅមុខថ្នាក់រៀនរបស់ពួកគេ ។
ទោះយ៉ាងណា នៅក្នុងការឆ្លើយឆ្លងគ្នាតាមសារ នៅលើប្រព័ន្ធផ្សព្វផ្សាយសង្គមនេះ បុរសជាឪពុកក្មេងស្រីបានសម្តែងការព្រួយបារម្ភថា ហេតុការណ៍នេះនឹងអាចឈានដល់ការសម្លុតបំភ័យចំពោះកូនស្រីរបស់គាត់ទៀត នៅថ្ងៃអនាគត ។
ជនដៃដល់អាចត្រូវបានលឺនិយាយនៅក្នុង Record សារថា៖ «ប្រសិននរណាម្នាក់សម្លុតគំរាមកូនប្រុសរបស់អ្នក តើអ្នកនឹងគាំទ្រទង្វើនោះដែរ ឬទេ?» ។
ឪពុកជនរងគ្រោះឈ្មោះ Ye Wanhuan បានប្រាប់សារព័ត៌មានថា៖ «បំណងប្រាថ្នាដ៏ធំបំផុតរបស់ខ្ញុំឥឡូវនេះ គឺថា ច្បាប់នឹងដាក់ទណ្ឌកម្មឲ្យបានធ្ងន់ធ្ងរបំផុត ចំពោះឃាតករ ដើម្បីផ្តល់ភាពយុត្តិធម៌ដល់កូនប្រុសរបស់ខ្ញុំ ។ កូនរបស់ខ្ញុំបានស្លាប់ដោយភាពអយុត្តិធម៌ណាស់» ។
ទន្ទឹមនោះផងដែរ ប៉ូលីសនិយាយថា របួសភ្នែកក្មេងស្រីនោះគឺស្រាលប៉ុណ្ណោះ ហើយវាពុំបង្កផលប៉ះពាល់ដែលធ្វើឲ្យនាងមិនអាចមករៀនបាននោះទេ ។ នេះបើតាម AsiaOne រាយការណ៍ឲ្យដឹង ។
ទោះយ៉ាងណា Ye ក៏បានសម្តែងការភ្ញាក់ផ្អើលយ៉ាងខ្លាំង ដែលហេតុការណ៍កើតឡើងនៅក្នុងថ្នាក់រៀនដ៏សាមញ្ញមួយ អាចបញ្ចប់ជីវិតកូនប្រុសរបស់គាត់បានយ៉ាងនេះ ។
ឪពុករូបនេះនៅបានបន្តថា៖ «តើក្នុងលោកនេះមានដែរទេ ដែលយើងអាចលើកដៃសម្លាប់ក្មេងជាមួយកាំបិតបែបនេះ? ។ ក្រៅពីនេះ ក្មេងៗសូម្បីពុំបានវាយតប់គ្នាផង ព្រោះថា កូនប្រុសរបស់ខ្ញុំនិយាយថា វាបានដួលទង្គិចទៅលើក្មេងស្រីនោះដោយចៃដន្យប៉ុណ្ណោះ» ។ ចន្ទី (ប្រភព៖ nextshark)