ពស់វែករនាមដ៏ធំ១ក្បាល ព្រោះតែទ្រាំទ្រនៅក្នុងព្រៃលែងបានដោយគ្មានទឹកផឹក វាបានលូនចូលមកកាន់ភូមិ Kaiga ប្រទេសឥណ្ឌា ដើម្បីស្វែងរកទឹក ។
តាម Daily Mail បុរសម្នាក់ពុំបានវាយបណ្តេញ ឬសម្លាប់វាទេ គាត់បានយកទឹក១ដប ចាក់សន្សឹមៗពីលើក្បាលរបស់វា ។
គាត់ពិតជាដឹងថា នេះជាការប្រឈមមុខគ្រោះថ្នាក់ខ្លាំងណាស់ ទើបគាត់បានដំបងសម្រាប់ចាប់ពស់១នៅដៃជាស្រេច ខណៈមិត្តភ័ក្ត្ររបស់គាត់ម្នាក់ ក៏ជួយកាន់កន្ទុយវាជាប់ បង្ការការវាយឆ្មក់ដោយពុំដឹងមុន ។
ឥណ្ឌាកំពុងជួបគ្រោះរាំងស្ងួតពុំធ្លាប់មាន ទឹកក្លាយជាវត្ថុដ៏កម្រមួយ ។ ហេតុនេះភ្នាក់ងារអភិរក្សសត្វពេលឃើញពពួកសត្វព្រៃរួមទាំងពស់ ចូលមកភូមិ គេតែងរកទឹកមកឲ្យវាផឹកជាមុនសិន ។
ចំណែកពោះវែករនាម “មហាសំណាង” មានប្រវែង ៤ម៉ែត្រនេះ ក្រោយមកត្រូវបានគេបញ្ជូនទៅកាន់មណ្ឌលថែទាំ សត្វព្រៃទៅ ៕ លីសា