ហេតុកាណ៍នេះបានកើតឡើងក្នុងជើងហោះហើរIndiGo របស់ក្រុមហ៊ុនអាកាចរណ៍ឥណ្ឌា Kolkata ដែលត្រៀមហោះហើរទៅកាន់ Mumbai កាលពីថ្ងៃទី២៦ ខែកញ្ញាម្សិលមិញនេះ។
សេចក្តីប្រកាសរបស់ IndiGo សរសេរថា «នៅពេលដែលយន្ដហោះកំពុងសំចតលើផ្លូវហោះហើរ អ្នកដំណើរម្នាក់បាន ចចេសរឹងរូសទាមទារចូលក្នុងបន្ទប់ពីឡុត ព្រោះទូរស័ព្ទខ្លួនត្រូវសាកថ្មបន្ទាន់។ តាមបទបញ្ជាកំណត់ មេក្រុមហោះហើរបាន សំណូមពរឱ្យអ្នកដំណើររូបនេះចេញផុតពីយន្តហោះ។
ទីភ្នាក់ងារសារព័ត៌មាន Press Trust of India បានដកស្រង់សម្តីមន្ត្រីអាកាសយានដ្ឋានឱ្យដឹងថា បុរសនេះមានអាយុប្រមាណ៣៥ឆ្នាំ ហើយកំពុងស្ថិតក្នុងសភាពស្រវឹងនិងមានទង្វើបង្កជម្លោះ។
ប៉ូលិសបានធ្វើការសួរចម្លើយ រួចក៏ដោះលែងបុរសនេះ ប៉ុន្តែមិនបានពិន័យជាប្រាក់ទេ។
នេះគឺជារឿងចម្លែកលើកទី២ហើយកើតឡើងក្នុងអំឡុងមួយសប្តាហ៍កន្លងមក។មុននោះក្រុមហ៊ុនអាកាសចរណ៍ GoAir ឱ្យដឹងថា មានអ្នកដំណើរម្នាក់បានប្រឹងប្រែងបើកទ្វារសង្គ្រោះបន្ទាន់នៅកន្ទុយយន្ដហោះ ព្រោះច្រឡំថាជាទ្វារបន្ទប់ទឹក ខណៈពេលយន្តហោះកំពុងធ្វើរដំណើរពី New Delhi ទៅកាន់Patna។តាមប្រព័ន្ធផ្សព្វផ្សាយក្នុងស្រុកអ្នកដំណើរនេះពុំបានដឹង ព្រោះគាត់ទើបតែបានជិះយន្តហោះជាលើកដំបូង៕
លីសា