តាម Reuters ប្រធានាធិបតីអាមរិកបានថ្លែងក្នុងអង្គប្រជុំអង្គការសហប្រជាជាតិ នាក្រុមប្រឹក្សាសន្តិសុខ UN ដែលលោកជាអធិបតីថា «ចិនប្រឹងប្រែងអន្តរាគមន៍ក្នុងការបោះឆ្នោតក្នុងខែវិច្ឆិការបស់យើងខ្ញុំ។ប្រឆាំងតបរដ្ឋអំណាចរបស់ខ្ញុំ»។ប៉ុន្តែលោកពុំបានផ្តល់ភស្តុតាងចំពោះការចោទប្រកាន់នេះទេ។
លោកTrump ពោលបន្ថែមថា «ពួកគេមិនចង់ឃើញឬយើងខ្ញុំទទួលបានជោគជ័យ ព្រោះខ្ញុំគឺជាប្រធានាធិបតីដំបូង ដែលធ្វើឱ្យចិនប្រឈមនឹងបញ្ហាពាណិជ្ជកម្ម ហើយយើងខ្ញុំកំពុងឈ្នះនៅក្នុងកម្រិតទាំងអស់។ យើងខ្ញុំមិនចង់ឱ្យពួកគេអន្តរាគមន៍ក្នុងការបោះឆ្នោតខាងមុខនេះ។
ប្រតិកម្មចំពោះការចោទប្រកាន់តបរបស់លោកTrump ប្រមុខការទូតចិន វ៉ាង យី ថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិថា៖ «យើងខ្ញុំពុំបាន ហើយនិងមិនអន្តរាគមន៍ទៅក្នុងបញ្ហាទាំងឡាយរបស់ប្រទេសណាមួយទាំងអស់។ យើងខ្ញុំទាត់ចោលរាល់ការចោទប្រកាន់មិនសក្តិសមប្រឆាំងនឹងប្រទេសចិន»។
ការបោះឆ្នោតនៅខែវិច្ឆិការបស់អាមេរិកនឹងសម្រេចថា តើគណបក្សសាធារណរដ្ឋរបស់Trump អាចបន្តត្រួតត្រាសភាជាន់ទាប និងព្រឹទ្ធសភាអាមេរិកដែរឬទេ។
សង្គ្រាមពាណិជ្ជកម្មអាមេរិក-ចិនកាន់តែតានតឹងឡើង។នៅដើមសប្តាហ៍នេះ អាមេរិកចាប់ផ្តើមអនុវត្តន៍អត្រាពន្ធ ១០ភាគរយលើទំនិញមានតម្លៃ២០០.០០០លានដុលា្លររបស់ចិន និងបានគំរាមបន្តវាយពន្ធបន្ថែមលើទំនិញមានតម្លៃ២៦៧.០០០លានដុល្លារទៀត។ ក្រុងប៉េកាំងបានតបតដោយប្រកាសកម្រិតពន្ធថ្មីលើទំនិញមានតម្លៃ៦០.០០០លានដុល្លាររបស់អាមេរិក។ មុននោះភាគីទាំងពីរបានដំឡើងពន្ធលើទំនិញមានតម្លៃ៥០.០០០លានដុល្លាររួចមកហើយ។
ក្រុង Washington ចោទប្រកាន់ក្រុងប៉េកាំងថាបានលួចកម្មសិទ្ធិបញ្ញា ហើយចាប់បង្ខំបណ្ដាក្រុនហ៊ុនអាមេរិកចែករំលែកបច្ចេកវិជ្ជា។ទន្ទឹមនោះអាមរិកក៏សំណូមពរឱ្យលុបអតិរេកពាណិជ្ជកម្មរវាងប្រទេសទាំងពីរ ខណៈពេលក្រុងប៉េកាំងនិយាយថា ជាយុទ្ធសាស្ត្រវែងឆ្ងាយ អាមេរិកមានបំណងរារាំងការរីកចម្រើនរបស់ប្រទសចិន៕
សូយន