សេដ្ឋីអង់គ្លេស និងភរិយាថៃរបស់គាត់ ដែលបានបាត់ខ្លួនត្រូវបានរកឃើញហើយ គឺអ្នកទាំងពីរត្រូវបានសម្លាប់ដោយបុរសថៃម្នាក់ (ត្រូវជាបងប្រុសបង្កើត និងជាបងថ្លៃ) ដែលបានអះអាងថាមាន «គំនុំ» ។
មេប៉ូលីសប្រចាំតំបន់៥ លោក Poonsap Prasertsak បាននិយាយកាលពីថ្ងៃអង្គារ៍ថា៖ «ឃាតករជាបងប្រុសបង្កើត បានតូចចិត្តដែលត្រូវបានមើលងាយដោយប្តីប្រពន្ធនេះ» ។
លោក Poonsap បានធ្វើសន្និសីទកាសែត បន្ទាប់ពីសាកសពរបស់លោក Alan Hogg អាយុ ៦៤ ឆ្នាំ និង Nott Sudaen អាយុ ៦១ ឆ្នាំ ត្រូវបានរកឃើញកប់នៅក្បែរព្រែកជីកមួយ នៅលើដីឡូត៍ដ៏ធំមួយ នៅក្នុង Tambon Chor Hae, ស្រុក Muang ខេត្ត Phrae ប្រទេសថៃ ។
អាជ្ញាធរបានចាប់ផ្តើមស្វែងរកប្តីប្រពន្ធរងគ្រោះ បន្ទាប់ពីមិត្តភក្តិរបស់ពួកគេបានប្រាប់ប៉ូលីសថា អ្នកស្រីពុំអាចទាក់ទងជាមួយពួកគេបាន ចាប់តាំងពីថ្ងៃទី១៩ ខែកញ្ញា ឆ្នាំ២០១៨ ។
តាមរយៈការស្រាវជ្រាវដ៏ជំនាញ ទីបំផុត សមត្ថកិច្ចបានឈានទៅឃាត់ខ្លួនបងប្រុសរបស់ Nott ឈ្មោះ Warut Wattanasajjakit, មិត្តភក្តិរបស់គាត់ឈ្មោះ Pia Khamsai ដែលអ្នកទាំងពីរអាយុ ៦៣ ឆ្នាំដូចគ្នា និងម្នាក់ទៀតឈ្មោះ Kittipong Khamwan អាយុ ២៤ ឆ្នាំ ។
តាមសេចក្តីរាយការណ៍បានឲ្យដឹងថា Warut បានប្រាប់ប៉ូលីសថា គាត់តែងត្រូវបានស្តីបន្ទោសពីសំណាក់ប្តីប្រពន្ធនេះ ។ ហើយដោយសារទប់កំហឹងនឹងការមើលងាយនេះតទៅទៀតបាន ទីបំផុត គាត់ក៏សម្រេចសម្លាប់ពួកគេចោលតែម្តង ។
លោក Poonsap និយាយថា ឃាតករនេះបានជួលមិត្តរបស់គាត់ ឲ្យបាញ់សម្លាប់លោក Hogg ក្នុងតម្លៃខ្លួន ៥ ម៉ឺនបាត ។
ប៉ូលីសនិយាយថា អំពើឃាតកម្មពីរករណីនេះ បានធ្វើឡើងនៅម៉ោងប្រហែល ៦ ល្ងាចថ្ងៃអង្គារ៍សប្តាហ៍មុន បន្ទាប់ពី Warut បានផ្តល់លុយឲ្យឃាតករស៊ីឈ្នួល២នាក់នេះរបស់គាត់ ។
យោងតាមការស៊ើបអង្កេត ឃាតករ Pia បានបាញ់សម្លាប់លោក Hogg ខណៈពេលគាត់កំពុងចាកចេញពីផ្ទះ ដើម្បីផ្តល់ចំណីដល់សត្វទារបស់គាត់ ។ ទន្ទឹមនោះផងដែរ ឃាតករទី២ Kittipong ក៏បានឃាត់ខ្លួន Nott ហើយមេឃាតករ Warut ដែលត្រូវជាបងប្រុសបង្កើត ក៏បានយកដែកបំពង់ទីបវាយមកលើក្បាលប្អូនស្រីរហូតស្លាប់តែម្តង ។
ឃាតករទាំង៣ បន្ទាប់មក បានប្រើអាប៊ុលតូច១គ្រឿង ដើម្បីជីកកប់សាកសពយ៉ាងជ្រៅ នៅក្បែរប្រឡាយមួយនៃដីឡូត៍របស់ជនរងគ្រោះទាំងពីរ ។
សូមបញ្ជាក់ផងដែរថា ប្តីប្រពន្ធរងគ្រោះនេះបានរួមរស់ជាមួយគ្នាអស់រយៈពេលជាង ១០ ឆ្នាំ មកហើយៗ បានទិញដីជាង ១០០ រ៉ៃ (rai) ដើម្បីធ្វើស្រែចម្ការ នៅតំបន់ Chor Hae ។ ហើយនៅទីនេះ ប្តីប្រពន្ធរងគ្រោះក៏បានសង់ផ្ទះដ៏ស្កឹមស្កៃមួយផងដែរ ។
លោក Poonsap បានឲ្យដឹងថា ឃាតករជាបងប្រុស និងជាបងថ្លៃរបស់ជនរងគ្រោះនេះ បានសារភាពថា គាត់ពុំចង់បានទ្រព្យសម្បត្តិរបស់ប្តីប្រពន្ធនេះទេ ។ ហើយគាត់បានអះអាងថា គាត់បានលក់រថយន្តដឹកទំនិញតូច១គ្រឿង ក្នុងក្តីសង្ឃឹមបានប្រាក់សម្រាប់ចំណាយទៅលើការគេចខ្លួនរបស់ពួកគេប៉ុណ្ណោះ ។
ទោះយ៉ាងណា Warut, Pia និង Kittipong ត្រូវបានចោទប្រកាន់ពីបទមនុស្សឃាត ៕
ដោយ៖ ឧត្តម
ប្រភព៖ nationmultimedia
