ខេត្តព្រះសីហនុ ៖ តំណាងសហគមន៍មានទំនាស់ដីធ្លីនាខេត្តព្រះសីហនុ បានឲ្យដឹងថា នៅព្រឹកថ្ងៃទី២៧ ខែកញ្ញា ឆ្នាំ២០១៨ នេះ វេលាម៉ោង ៨ និង៣០នាទីព្រឹក សាលាដំបូងខេត្តព្រះសីហនុ នឹងធ្វើការបើកសវនាការលើករណីវិវាទដីធ្លី របស់តំណាងប្រជាពលរដ្ឋក្នុងសហគមន៍អូរខ្សាច់ នៅឃុំអូរត្រេះ ស្រុកស្ទឹងហាវ ខេត្តព្រះសីហនុ ចំនួន ៤នាក់រួមមាន ៖ លោកស្រី ឡុច ទូច តំណាងសហគមន៍អូរខ្សាច់ លោក ញ៉ាញ់ ជាតិ មែន ខេន និង កៅ ហេង ដែលត្រូវបានតុលាការឃុំខ្លួនពីបទ “ជនប្រើអំពើហឹង្សាលើអ្នកកាន់កាប់អចលនវត្ថុដោយសុចរិត” កាលពីថ្ងៃទី៧ ខែឧសភា ឆ្នាំ២០១៨។
វិវាទដីធ្លីខាងលើនេះ ប្តឹងដោយឧកញ៉ា តាន់ តាត់ និងលោក ឡុញ វណ្ណ: ដែលត្រូវបានគេស្គាល់ថា ជាអ្នកមានលុយ និងមានអំណាចក្រៃនាខេត្តព្រះសីហនុ..។
តំណាងសហគមន៍មានទំនាស់ដីធ្លីខេត្តព្រះសីហនុ បានឲ្យដឹងថា ក្នុងដំណើរការ នៃការបើកសវនាការនេះដែរ ក្រុមគ្រួសារអ្នកស្រី ឡុច ទូច និងប្រជាពលរដ្ឋសហគមន៍ ដែលមានជម្លោះដីធ្លីចំនួន១៣សហគមន៍ផ្សេងទៀត នៅទូទាំងខេត្តព្រះសីហនុមានចំនួនប្រមាណ ៥០០នាក់ នឹងលើកគ្នាឡើងទៅគាំទ្រ ឃ្លាំមើល និងតវ៉ានៅមុខសាលាដំបូងខេត្តព្រះសីហនុ ដើម្បីស្នើរសុំអោយតុលាការទំលាក់ចោលការចោទប្រកាន់ដល់ អ្នកស្រី ឡុច ទូច ដែលជាតំណាងសហគមន៍អូរខ្សាច់ និងសមាជិក៣នាក់ទៀត ស្នើឲ្យដោះលែងពួកគាត់ឲ្យមានសេរីភាពវិញ៕ ដោយ៖ ដែន សីមា
