ខេត្តព្រះសីហនុ ៖ អនុវត្តតាមខ្លឹមសារប្រកាសលេខ ០៤៨ ក.ជ.អ.ជ ស្ដីពីការផលិតការប្រើប្រាស់ទឹកត្រី ទឹកស៊ីវអ៊ីវ មានជាតិដែក និងសារៈសំខាន់នៃការប្រើប្រាស់ទឹកត្រី ទឹកស៊ីអ៊ីុវ ដែលមានជាតិដែក និងពង្រឹងការអនុវត្តស្តង់ដាសម្រាប់ទឹកត្រី ទឹកស៊ីអ៊ីវ ដែលកម្មវិធីនេះបានរៀបចំឡើងដោយនាយកដ្ឋានលើកកំពស់អាហារូបត្ថម្ភក្រសួងផែនការ ក្រោមកិច្ច សហការជាមួយ សាលាខេត្ត និងមន្ទីរផែនការខេត្តព្រះសីហនុ ក្នុងគោលបំណងអភិវឌ្ឍសង្គម ជាតិប្រកបដោយចិរភាពជាពិសេស ដើម្បីជោគជ័យនៅក្នុងគោលដៅកាត់បន្ថយភាពស្លេកស្លាំងនិងដើម្បីចូលរួមចំណែកលើក កម្ពស់ស្ថានភាពអាហារូបត្ថម្ភនៅកម្ពុជា។
កិច្ចប្រជុំនេះធ្វើឡើង កាលពីព្រឹកថ្ងៃទី២៦ ខែកញ្ញា ឆ្នាំ២០១៨ នៅមន្ទីរឧស្សាហកម្ម និងសិប្បកម្មខេត្ត ក្រោមអធិបតីភាព ឯកឧត្តម ថេង បញ្ញាធន ប្រតិភូរាជរដ្ឋាភិបាលកម្ពុជាទទួលបន្ទុកអគ្គនាយកផែនការ នៃក្រសួងផែនការ លោកស្រី ហៀក ហ៊ីមុល្លីអភិបាលរង នៃគណៈអភិបាលខេត្តព្រះសីហនុ និងវត្តមានចូលរួមពីសំណាក់មន្ត្រីមន្ទីរពាក់ព័ន្ធជុំវិញខេត្ត អង្គការមិនមែនរដ្ឋាភិបាល អាជីវករ ជាច្រេីនរូបទៀត។មានប្រសាសន៍បើកកិច្ចប្រជុំនេះ ឯកឧត្តមប្រតិភូរាជរដ្ឋាភិបាលកម្ពុជា បានបញ្ជាក់ថា បញ្ហាកង្វះអាហារូបត្ថម្ភជាតិដែក គឺជាបញ្ហាចម្បងមួយនៅក្នុងចំណោមបញ្ហាចម្បង៣ទៀត គឺបញ្ហាខ្វះប្រូតេអ៊ីុន និងថាមពល កង្វះជីវជាតិអា និងកង្វះជាតិអ៊ីយ៉ូដ បញ្ហាកង្វះជាតិដែក បណ្ដាលឲ្យការវិវឌ្ឍន៍ផ្នែករូបរាងកាយនិងការលូតលាស់ខាងប្រាជ្ញាស្មារតី របស់កុមារមានភាពយឺតយ៉ាវ។ ជាងនេះ ប្រសិនបើមានកង្វះជាតិដែកកើតឡើងតាំងពីទារក នៅក្នុងផ្ទៃម្ដាយនោះវានឹងបណ្ដាលឱ្យទារកអាចស្លាប់នៅក្នុងផ្ទៃឬទារកនឹងកើត មកមិនគ្រប់ទម្ងន់ហើយវានឹងឈានទៅដល់ការខ្វះលទ្ធភាពចូលរួមចំណែកនៅក្នុងការកសាងសេដ្ឋកិច្ចសង្គមទៀតផង។
ឯកឧត្តមបន្តថា ដោយយល់ច្បាស់អំពីគ្រោះថ្នាក់ខាងលើរាជរដ្ឋាភិបាលបានដាក់ឲ្យអនុវត្តនូវកម្មវិធីកាត់បន្ថយភាពស្លេកស្លាំងតាមរយៈការបញ្ចូលជាតិដែក ចូលទៅក្នុងទឹកត្រីទឹកស៊ីអ៊ីវចាប់ពីឆ្នាំ២០០៥ មកម្ល៉េះ ហើយថា ជាលទ្ធផលមកទល់បច្ចុប្បន្ននេះ កម្មវិធីកាត់បន្ថយភាពស្លេកស្លាំងកំពុងអនុវត្ត នៅទូទាំងព្រះរាជាណាចក្រកម្ពុជា ដោយត្រូវឆ្លងកាត់ឧបសគ្គ នៃការលំបាកជាច្រើនទើបសម្រេចបានមកដល់ដំណាក់កាលមួយ ដែលកម្ពុជាអាចមានទឹកត្រីទឹកស៊ីអ៊ីវមានជាតិដែកលក់នៅស្ទើរតែគ្រប់ទីផ្សារសម្រាប់បំពេញសេចក្តីត្រូវការ របស់ប្រជាពលរដ្ឋ។
ឯកឧត្តមបញ្ជាក់ឲ្យដឹងដូច្នេះ រួចក៏បានលើកទឹកចិត្តដល់នាយកដ្ឋានលើកកម្ពស់អាហារូបត្ថម្ភ នៃអគ្គនាយកដ្ឋានផែនការ ក្រសួងផែនការ ដែលបានដឹកនាំអនុវត្តកម្មវិធីកាត់បន្ថយភាពក្រីក្រតាមរយៈការបញ្ចូលជាតិដែក ចូលទៅក្នុងទឹកត្រីទឹកស៊ីអ៊ីវយ៉ាងសកម្មនិងដោយឆន្ទៈមុះមុត រហូតទទួលបានលទ្ធផលគួរជាទីមោទនៈ មកដល់សព្វថ្ងៃនេះ។
ព្រមជាមួយគ្នានេះ លោកស្រីអភិបាលរងខេត្ត ហៀក ហ៊ីមុល្លី បានកោតសរសេីរ និងវាយតំលៃខ្ពស់ចំពោះកិច្ចខិតខំប្រឹងប្រែងរបស់នាយកដ្ឋានលេីកកំពស់អាហាររូបត្ថម នៃក្រសួងផែនការ។
លោកស្រី បានសំណូមពរដល់ស្ថាប័នពាក់ព័ន្ធអង្គការ ដៃគូអភិវឌ្ឍន៍នានាទាំងនៅថ្នាក់ជាតិ និងថ្នាក់ក្រោមជាតិសូមចូលរួមចំណែកជំរុញ និងឧបត្ថម្ភគាំទ្រដល់កម្មវិធីនៅកម្ពុជាជាបន្តទៀតដើម្បីរក្សាជីវភាពនៃកម្មវិធីខាងលើនេះក៏ដូចជាដើម្បីសុខភាព របស់ប្រជា ពលរដ្ឋទូទៅជាពិសេសស្ត្រីនិងកុមារនៅក្នុងព្រះរាជាណាចក្រកម្ពុជា៕ ដោយ៖ ដែន សីមា
