ការប្រើប្រាស់អំពើហិង្សាពីសំណាក់បុរសលើស្ត្រីគឺនៅតែជាបញ្ហាគួរឲ្យព្រួយបារម្ភ។ ករណីនេះបានកើតឡើងលើស្ត្រីអាមេរិចម្នាក់។ នាងត្រូវបានមិត្តប្រុសធ្វើបាប គំរាម និងបង្ខាំងទុក អស់ជាច្រើនថ្ងៃ ប៉ុន្តែនាងបានប្រើប្រាស់វិធីសាស្ត្រដ៏ឆ្លាតមួយ ដើម្បីរំដោះខ្លូនចេញពីគ្រោះថ្នាក់។
នាងអាចមានឱកាសរំដោះខ្លួនចេញពីមិត្តប្រុសដែលចូលចិត្តប្រើហង្សា នៅពេលដែលនាងបញ្ចុះបញ្ចូលមិត្តប្រុសនាងឲ្យនាំយកឆ្កែរបស់នាង មកពិនិត្យសុខភាព។ នៅពេលផ្តល់ពត៌មានឲ្យបុគ្គលិកពេទ្យសត្វរួច នាងក៏បានសុំមិត្តប្រុសនាងឲ្យមើលឆ្កែមួយភ្លែត ហើយនាងទៅបន្ទប់ទឹក។
ប្រហែល ២នាទីក្រោយមក នាងចេញពីបន្ទប់ទឹក និងដើរកាត់កន្លែងទទួលភ្ញៀវ រួចនាងក៏បានហុចអ្វីមួយឲ្យបុគ្គលិកនៅទីនោះ បន្ទាប់មកនាងក៏ដើរចូលក្នុងបន្ទប់រងចាំជាមួយនឹងមិត្តប្រុសនាងវិញ។
នៅពេលបុគ្គលិកបានអានក្រដាស ដែលស្ត្រីខាងលើហុចអោយ ពួកគេបានដឹងពីសុខទុក្ខរបស់ស្ត្រីនោះ និងបានធ្វើការឆ្លើយតបភ្លាមៗ ដោយពួកគេបានតេរកអន្តរាគមន៍ពីប៉ូលិស។
ក្នុងក្រដាសនោះគាត់បានសរសេរដូច្នេះថា “សូមជួយតេប្រាប់ប៉ូលីសផង! មិត្តប្រុសខ្ញុំគំរាមខ្ញុំ។ គាត់មានកាំភ្លើងនៅនឹងខ្លួន។ កុំឲ្យគាត់ដឹងរឿងនេះឲ្យសោះ”។
បន្ទាប់ពីបានតេស្វែងរកអន្តរាគមន៍រួច រយៈពេល ១៥នាទី ប៉ូលីស ៥នាក់ក៏បានមកដល់។ ពួកគេបានដកហូតកាំភ្លើងពីបុរសប្រើហឹង្សានោះ និងចាប់នាំខ្លួនគេទៅផងដែរ។
បន្ទាប់ពីមិត្តប្រុសត្រូវប៉ូលីសចាប់ខ្លួនភ្លាម ស្ត្រីខាងលើក៏រៀបរាប់ទាំងទឹកភ្នែកថា នាងត្រូវមិត្តប្រុសធ្វើបាប និងបង្ខាំងទុកអស់រយៈពេល ២ថ្ងៃ ហើយនាងក៏បានបង្ហាញស្នាមរបួសដែលមានលើដងខ្លួនដល់ប៉ូលីសផងដែរ។
មិត្តប្រុសរបស់នាង ត្រូវបានចោទប្រកាន់ពីបទប្រើប្រាស់អំពើហឹង្សា ការគំរាមដោយប្រើអាវុធ៕ ប្រភព ៖ fb
