តាកែវ ៖ ឯកឧត្តម អ៊ូច ភា អភិបាលខេត្ត បានមានប្រសាសន៍ថា ការរៀបចំក្រុងពាលីជួសជុល និងផ្លាស់ប្តូរទីតាំងរូបសំណាកតាកែវយាយកែវនេះ គឺដើម្បីធ្វើការកែលម្អរក្នុងក្រុងដូនកែវឲ្យមាន សោភ័ណ្ឌភាព និងជួសជុលកែលម្អរូបសំណាកតាកែវយាយកែវ ដែលប្រជាពលរដ្ឋគោរពបូជានោះ ឲ្យថ្មីស្អាតឡើងវិញ ព្រោះថា រូបសំណាកលោកទាំងពីរ មានសភាពចាស់ ហើយក្នុងនោះដែរ ការផ្លាស់ ប្តូរទីតាំងនេះ ក៏ដើម្បីឲ្យមានភាពទូលាយ ងាយស្រួលដល់ប្រជាពលរដ្ឋធ្វើដំណើរទៅមកផងដែរ ។
ការថ្លែងបែបនេះគឺក្នុងពេលដែលឯកឧត្តមអភិបាលខេត្តនិងលោកជំទាវ រួមជាមួយលោក លោកស្រី ប្រធានអនុប្រធានមន្ទីរអង្គភាពជុំវិញខេត្ត កងកំម្លាំងប្រដាប់អាវុធទាំង៣ ប្រភេទ បានអញ្ជើញចូលរួមក្នុងពិធីក្រុងពាលី សុំម្ចាស់ទឹកម្ចាស់ដីផ្លាស់ប្តូរទីតាំង និងជួសជុលរូប សំណាកតាកែវយាយកែវ ដែលមានទីតាំងនៅទល់មុខបេនឡានផ្សារតាកែវ ឋិតនៅក្នុងភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ កាលពីព្រឹកថ្ងៃទី ២៧ ខែកញ្ញា ឆ្នាំ២០១៨ ។
បើតាម ឯកឧត្តម អភិបាលខេត្ត អ៊ូច ភា បានមានប្រសាសន៏ទៀតថា នៅក្នុងគម្រោងជួសជុល និងផ្លាស់ទីតាំងរូបសំណាក តាកែវយាយកែវនេះ គឺមានការគាំទ្រច្រើន ពីសំណាក់បងប្អូនប្រជាពលរដ្ឋនៅក្នុងខេត្តតាកែវផងដែរ តាមរយៈការបង្ហោះនៅលើបណ្តាញទំនាក់ទំនងសង្គមហ្វេកបុកផ្លូវការរបស់ឯកឧត្តមផងដែរ ។ ឆ្លៀតនៅក្នុងឱកាសនោះដែរ ឯកឧត្តមអភិបាលខេត្ត បានដឹកនាំមន្ត្រីរាជការ ទៅដាំដើមរាំងភ្នំ ជាង៤០ដើម នៅបរិវេណជុំវិញវត្ត សីហរតនារាម ស្ថិតនៅក្រុងដូនកែវ ខេត្តតាកែវ ៕ តាកែវ
