ខេត្តព្រះសីហនុ ៖ អភិបាលខេត្តព្រះសីហនុ លោក យន្ត មីន កាលពីព្រឹកថ្ងៃទី២៧ ខែកញ្ញា ឆ្នាំ២០១៨នេះ បានដឹកនាំកិច្ចប្រជុំត្រួតពិនិត្យការងារទូទៅ របស់រដ្ឋបាលខេត្ត ដែលបានអនុវត្តន៍ក្នុងខែកញ្ញា ឆ្នាំ២០១៨ និងដាក់ទិសដៅសម្រាប់អនុវត្តន៍បន្ត ដោយផ្តោតលើការជំរុញអោយមន្ត្រីក្នុងអង្គភាពកងកម្លាំងប្រដាប់អាវុធ មន្ត្រីតាមមន្ទីរអង្គភាពស្ថាបន័រដ្ឋក្នុងខេត្ត និងមន្ត្រីរដ្ឋបាលមូលដ្ឋានតាមស្រុក ក្រុង ឃុំ សង្កាត់ យកចិត្តទុកដាក់ ដោះស្រាយការងារបន្ទាន់ៗចំពោះមុខជូនប្រជាពលរដ្ឋ។ ជាងនេះទៅទៀត មន្ត្រីជំនាញស្ថាប័នពាក់ព័ន្ធ ក៏រួមគ្នាអនុវត្តន៍ការងារអោយបានល្អ តាមគោលនយោបាយ របស់រាជរដ្ឋាភិបាលអាណត្តិទី៦នេះ ក្រោមការដឹកនាំ របស់សម្តេចអគ្គមហាសេនាបតីតេជោហ៊ុន សែន។
លោក យន្ត មីន បន្តថា នៅចំពោះមុខ ការងារបន្ទាន់ ដែលរដ្ឋបាលក្រុង-ខេត្ត ត្រូវដោះស្រាយរួមមាន៖ ការរក្សាអោយបានសន្តិសុខសណ្តាប់ធ្នាប់សង្គម ការសម្រួលជួសជុលផ្លូវខូចជាបណ្តោះមុនពេលមានការជួសជុលជាផ្លូវការ ក្រោយភ្លៀងរាំង ការផ្តល់សេវាទូទៅជូនប្រជាពលរដ្ឋ ឬការជួយប្រជាពលរដ្ឋដែលជួបបញ្ហាផ្នែកជីវភាព និងមានជម្ងឺសម្រាកព្យាបាល ក្នុងមន្ទីរពេទ្យ ការចុះជួយប្រជាពលរដ្ឋលើការងារបង្កបង្កើនផលស្រូវរដូវវស្សា និងជួយទប់ស្កាត់កាត់បន្ថយបញ្ហាគ្រោះថ្នាក់ចរាចរណ៍ជាដើម..៕ ដោយ៖ ដែន សីមា
