៤ឆ្នាំមុន ព្រឹត្តិការណ៍គ្រោះថ្នាក់ដ៏ធ្ងន់ធ្ងរមួយបានធ្វើឲ្យជីវិតរបស់លោក Tian Haicheng អាយុ ៣៨ឆ្នាំ បានប្រែក្រឡាសទាំងស្រុង ។ គាត់បាត់បង់លទ្ធភាពធ្វើដំណើរ ដៃទាំងគូក្លាយជាពិការ ពុំអាចធ្វើអ្វីជួយគ្រួសារបាន ថែមទាំងក្លាយជា “អម្រែក” ដល់អ្នកដទៃ ។ នៅអំឡុងពេលដ៏សែនលំបាកនេះ ភរិយារបស់ Tian បែរជានាំយកកូនប្រុសចាកចេញចោលដោយទុកកូនស្រីវ័យ ៦ឆ្នាំ ឲ្យនៅជាមួយទាំងគ្មានការសោកស្តាយស្រណោះ ។
ប៉ុន្តែក្មេងស្រីនេះពុំបានធ្វើឲ្យឪពុកវាព្រួយបារម្ភប៉ុណ្ណោះទេ វាបានរ៉ាប់រងកិច្ចការសព្វមុខក្នុងផ្ទះ តាំងពីដាំស្ល បោកសំអាត និងថែទាំឪពុក ។
ពិតជាពិបាកជឿថា ក្មេងស្រីទើបមានវ័យតែ ៦ឆ្នាំ អាចមើលថែខ្លួនឯងផង ហើយថែទាំបានទាំងឪពុកពិការផង ។ យ៉ាងណាក្មេងស្រីតូចបានបញ្ជាក់ថា នាងបានធ្វើ ហើយធ្វើបាន ។
នាងអាចធ្វើបានគ្រប់កិច្ចការក្នុងផ្ទះ និងមើលថែឪពុក ។
ខ្សែវីដេអូមួយ ត្រូវបានថត និងចែករំលែកលើបណ្តាញសង្គមចិន ។ នាងតូចចេះទាំងលាបថ្នាំ ជួយឪពុកអង្គុយក្នុងរទេះ អានសៀវភៅ និងជួយលើកឪពុកឡើងលើគ្រែដេក ។
… មានកូនស្រីបែបនេះ លោក Tian អាចឆ្លងផុតការបាក់ទឹកចិត្ត ហើយកំពុងសំឡឹងទៅកាន់អនាគតមួយថ្មី ។ ទោះបីគ្រោះថ្នាក់ បានធ្វើឲ្យគាត់ពិការ តែគាត់សង្ឃឹមថា នឹងអាចប្រឹងប្រែងកាត់បន្ថយអម្រែកដល់កូនស្រី ដែលនៅក្មេងខ្ចី និងគួរឲ្យអាណិតរបស់ខ្លួន ។
កូនស្រីតូចតន់ ក្លាយជាបង្អែករឹងមាំដើម្បី Tian បន្តប្រឈមនឹងឆាកជីវិត ។
Tian បានចែករំលែករូបភាព និងវីដេអូអំពីរូបលោក និងកូនស្រីដោយក្តីមោទនៈនៅលើបណ្តាញសង្គម ។ ពិតណាស់រឿងបែបនេះ វាពុំលំបាក រីករាលដាលទេ ។ ខ្សែវីដេអូថ្មីបំផុតលើ Pear Video ទទួលបានការចែករំលែកយ៉ាងខ្លាំងលើ Wechat ។
Tian សង្ឃឹមថា នឹងកាត់បន្ថយអម្រែកដល់កូនស្រីតូចតន់។
មិនថាអ្នកណាទេ ក៏នាំគ្នាជញ្ជក់មាត់សរសើរចំពោះការលូតលាស់មុនវ័យរបស់នាងតូច ។
ប៉ុន្តែសំខាន់ជាងគេនោះគឺក្តីអាណិតអាសូរចំពោះក្មេងស្រីតូចដែលត្រូវ “ឆក់ប្លន់បាត់” នូវកុមារភាព ដែលក្មេងៗក្នុងវ័យស្របាលគ្នាបាននឹងកំពុងទទួល ។
យ៉ាងណា ជីវិតនៅមានពេលវេលាវែងសម្រាប់នាងតូច វាសនារបស់នាងប្រាកដជាវេទនា ពុំមើលរំលងទេ ៕ ចន្ទ្រា