បុរសម្នាក់ថយរថយន្ត ខ្វះការប្រុងប្រយ័ត្ន បណ្តាលឲ្យកិនអ្នកថ្មើរជើងស្រវឹងម្នាក់គួរឲ្យអាសូរ ។ តាមប្រភពព័ត៌មានបានឲ្យដឹងថា ហេតុការណ៍គួរឲ្យរន្ធត់នេះ បានកើតឡើងនៅក្នុងប្រទេសចិន កាលពីថ្ងៃទី២២ ខែកញ្ញា ឆ្នាំ២០១៨ ។
តាមរយៈវីដេអូពីកាមេរ៉ាសន្តិសុខ បានបង្ហាញបុរសម្នាក់ដើរស្ថិតក្នុងស្ថានភាពស្រវឹង និងខណៈមកដល់ត្រង់ចំណុចច្រកផ្លូវចេញចូល ក៏ស្រាប់តែរថយន្ត១គ្រឿងថយក្រោយ ជល់នឹងគាត់តែម្តង ។ ខណៈពេលនោះ បុរសស្រវឹងនោះ ក៏បានព្យាយាមយកខ្លួនបញ្ឈប់រថយន្ត ប៉ុន្តែ ទោះយ៉ាងណា អ្នកបើកបរដែលថយរថយន្តគ្មានមើលក្រោយ នៅតែបន្តថយរថយន្ត រហូតធ្វើឲ្យបុរសនោះដួលចូលក្រោមកង់រថយន្តតែម្តង ។
ប៉ូលីសចរាចរណ៍បានបញ្ជាក់ថា អ្នកបើកបរនោះត្រូវតែទទួលខុសត្រូវ នៅក្នុងហេតុការណ៍នេះទាំងស្រុង ហើយជនរងគ្រោះត្រូវបានពិនិត្យឃើញរងរបួសបាក់ឆ្អឹង បន្ទាប់ពីត្រូវបានបញ្ជូនទៅសង្គ្រោះនៅមន្ទីរពេទ្យ ៕ ឧត្តម