ខេត្តស្វាយរៀង ៖ លោកស្រី ដួង វណ្ណា អនុប្រធានកិត្តិយសសាខាកាកបាទក្រហមកម្ពុជាខេត្តស្វាយរៀង និងសហការី នៅថ្ងៃព្រហស្បតិ៍ ៣រោជ ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ២៧ ខែ កញ្ញា ឆ្នាំ ២០១៨ បាននាំយក អំណោយមនុស្សធម៌ទៅសួរសុខទុក្ខ និងចែកជូនចាស់ជរា ៧៣ គ្រួសារ កុមារកំព្រា ២ គ្រួសារ និងគ្រួសារមានជីវភាពខ្វះខាត ៨៨ គ្រួសារ សរុប ១៦៣ គ្រួសារ មកពី ១០ ឃុំ ក្នុងស្រុកស្វាយជ្រំ ។
ពិធីនេះបានរៀបចំនៅទីស្នាក់ការអនុសាខាកាកបាទក្រហមកម្ពុជាស្រុកស្វាយជ្រំ ខេត្តស្វាយរៀង។
មានប្រសាសន៍សំណេះសំណាលនាឱកាសនោះលោកស្រី ដួង វណ្ណា អនុប្រធានកិត្តិយសសាខា បានពាំនាំនូវសេចក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតគូរសុខទុក្ខប្រជាពលរដ្ឋក្រីក្រ ពិសេស ចាស់ជរាគ្មានទីពឹង កុមារកំព្រា ស្ត្រីមេម៉ាយ និងបានផ្ដាំផ្ញើដល់ពួកគាត់ឲ្យខិតខំថែរក្សាសុខភាព មានអនាម័យក្នុងការរស់នៅ ហើយត្រូវប្រកាន់ខ្ជាប់នូវការហូបស្អាត ផឹកស្អាត និង រស់នៅស្អាត ដើម្បីការពារជម្ងឺឆ្លងនានាដែលបណ្តាលមកពីការកង្វះអនាម័យ ។
លោកស្រីក៏បានសំណូមពរសូមឲ្យបងប្អូនដែលរស់នៅក្នុងសហគមន៍ទាំងអស់ ត្រូវមានការសាមគ្គីគ្នា ចេះជួយទុក្ខធុរៈគ្នាទៅវិញទៅមក និង ជៀសឲ្យឆ្ងាយពីអំពើអសកម្មនានាដែលសង្គមជាតិស្អប់ខ្ពើម ណែនាំកូនចៅឲ្យគោរពច្បាប់ចរាចរណ៍ ជៀសឲ្យឆ្ងាយពីគ្រឿនញៀន ដើម្បីឲ្យសហគមន៍យើងរស់នៅប្រកបដោយភាពសុខដុមរមនា ។ អំណោយដែលចែកជូនទាំង ១៦៣ គ្រួសារ ក្នុង ១ គ្រួសារទទួលបាន អង្ករ ៣០ គ.ក្រ កន្ទេលបត់ ១ មី ១ កេស ត្រីខ ១០ កំប៉ុង ទឹកស៊ីអ៊ីវ ៦ ដប មុង ១ ភួយ ១ ក្រមា ១ សារុង ១ និងថវិកា ៤០.០០០ រៀលផងដែរ ៕ ដោយ ៖ វ៉ៃកូ
