ខេត្តព្រះសីហនុ៖ តំណាងសហគមន៍មានទំនាស់ដីធ្លីនាខេត្តព្រះសីហនុ បានឲ្យដឹងថា នៅព្រឹកថ្ងៃទី២៧ ខែកញ្ញា ឆ្នាំ២០១៨ បន្តរិះគន់នីតិវិធី របស់សាលាដំបូងខេត្តព្រះសីហនុ ថា ធ្វើការងារមិនយុត្តិធម៌។
សាររិះគន់នេះ បានកើតមានជាថ្មីទៀត នៅព្រឹកថ្ងៃទី២៧ ខែកញ្ញា ឆ្នាំ២០១៨នេះ នៅគ្រាសាលាដំបូងខេត្តព្រះសីហនុ បានបើកសវនាការលើករណីវិវាទដីធ្លី របស់តំណាងប្រជាពលរដ្ឋក្នុងសហគមន៍អូរខ្សាច់ នៅឃុំអូរត្រេះ ស្រុកស្ទឹងហាវ ខេត្តព្រះសីហនុចំនួន ៤នាក់រួមមាន ៖ លោកស្រី ឡុច ទូច តំណាងសហគមន៍អូរខ្សាច់ លោក ញ៉ាញ់ ជាតិ មែន ខេន និង កៅ ហេង ដែលត្រូវបានសាលាដំបូងខេត្តព្រះសីហនុ ឃុំខ្លួនដាក់ពន្ធនាគារចោទពីបទ “ជនប្រើអំពើហឹង្សាលើអ្នកកាន់កាប់អចលនវត្ថុដោយសុចរិត” កាលពីថ្ងៃទី៧ ខែឧសភា ឆ្នាំ២០១៨។
វិវាទដីធ្លីខាងលើនេះ ប្តឹងដោយឧកញ៉ា តាន់ តាត់ និងលោក ឡុញ វណ្ណ: ដែលត្រូវបានគេស្គាល់ថា ជាអ្នកមានលុយសន្ធឹកសន្ធាប់ និងមានអំណាចដ៏សម្បើមក្រៃ នាខេត្តព្រះសីហនុ..។
តំណាងសហគមន៍មានទំនាស់ដីធ្លីខេត្តព្រះសីហនុ បានឲ្យដឹងថា ក្នុងដំណើរការ នៃការបើកសវនាការនេះដែរ ក្រុមគ្រួសារអ្នកស្រី ឡុច ទូច និងប្រជាពលរដ្ឋសហគមន៍ ដែលមានជម្លោះដីធ្លីចំនួន១៣សហគមន៍ផ្សេងទៀត នៅទូទាំងខេត្តព្រះសីហនុមានចំនួនប្រមាណរាប់រយនាក់ បានលើកគ្នាឡើងទៅគាំទ្រ និងតវ៉ានៅមុខសាលាដំបូងខេត្តព្រះសីហនុ ដើម្បីស្នើរសុំអោយតុលាការខេត្តនេះ ទំលាក់ចោលការចោទប្រកាន់ដល់ អ្នកស្រី ឡុច ទូច ដែលជាតំណាងសហគមន៍អូរខ្សាច់ និងសមាជិក៣នាក់ទៀត ដោយទាមទារឲ្យតុលាការដោះលែងពួកគាត់ឲ្យមានសេរីភាពវិញ។
សវនាការរបស់សាលាដំបូងខេត្តព្រះសីហនុ កាលពីព្រឹកមិញនេះ មិនទាន់បានបញ្ចប់ទេ ដោយត្រូវលើកពេលទៅបើកសវនាការ នៅថ្ងៃទី៣ ខែតុលា ឆ្នាំ២០១៨ជាបន្តទៀត៕ ដោយ៖ ដែន សីមា