នឹកស្មានថានៅសុខៗត្រូវបានគេសងថ្លៃស៊ីផឹកជំនួសជារឿងរីករាយ ស្មានពុំដល់ថា ពេលខ្លះនៅកន្លែងខ្លះពុំចេះតែទទួលបានផលល្អនោះទេ ។ វាគឺជារឿងថ្មីៗរបស់បុរសនៅចិន ។
ថ្មីៗនេះ នៅ Heng Shui ខេត្ត Hebei ប្រទេសចិន បានកើតមានរឿងហេតុកម្រប្រទះមួយ ។ ប្រភពព័ត៌មាននៅតំបន់នេះ ឲ្យដឹងថា នៅហាងគ្រឿងសមុទ្រមួយលោក ចាង និងលោកវ៉ូ សុទ្ធសឹងនាំមិត្តភក្តិរបស់ខ្លួនមកជប់លៀងនៅទីនេះ ។
អ្នកទាំងពីរ (ចាង និងវ៉ូ) ពុំដែលស្គាល់គ្នាទេ ចៃដន្យអង្គុយតុក្បែរគ្នា ។ នៅតុទាំង២ ពិតជាមានភាពច្រៀងសប្បាយពេលស្រវឹង ។
នៅពេលស្រវឹងលោកចាងពេលនោះបែបរៀងចង់ “ឲ្យឡូយ” ក៏ហៅអ្នកបម្រើមកប្រាប់ថា ៖ ថ្ងៃនេះ ខ្ញុំរីករាយណាស់តុក្បែរនេះទុកខ្ញុំជាអ្នកប៉ាវ ! ។
ស្មានពុំដល់ថា ស្រាប់តែឮសូរបែបនេះ លោកវ៉ូ ដែលកំពុងស្រវឹងស្រឿងៗដែរ ក៏ស្រែកដាក់ថា ៖ អ្នកណាអញ្ជើញ? អ្នកណាត្រូវការលោកឯងប៉ាវ? និយាយបែបនេះលោកឯងចង់មើលងាយថា ខ្ញុំគ្មានលុយផឹកស៊ីឬ? ។ លោកចាង ដែល “មានសន្តានចិត្ត” ក៏ឆ្លើយតប… ។
ចុងក្រោយសង្គ្រាមពាក្យសម្តីរវាងតុទាំង២ បានឈានដល់ការប្រើដៃប្រើជើង …ទម្រាំប៉ូលិសមកប្រមូលទៅកាន់ប៉ុស្តិ៍ទាំងអស់ ។
ទាំងសងខាង សុទ្ធសឹងទទួលបានវិក័យបត្រសម្រាប់ “ចាយលុយ” បង់ការផាកពិន័យពីបទ… បង្កចលាចលធ្វើឲ្យខូចសណ្តាប់ធ្នាប់ ។
នេះដូចគេថា ៖ “សេពគ្រឿងស្រវឹងជួយបង្កើនភាពក្លាហាន តែវាកាត់បន្ថយសតិបញ្ញា” ពុំខុសមែន! ៕ លីសា