ភ្នំពេញ ៖ អភិបាលរងរាជធានីភ្នំពេញ លោកកើត ឆែ បានថ្លែង ថា មន្ត្រីរាជការនៃរដ្ឋបាលរាជធានីភ្នំពេញមានចំនួនជិត១ម៉ឺនប្រាំពាន់នាក់ ដែលបាននឹងកំពុងបំរើការងារ ជូនប្រជាពលរដ្ឋនៅភ្នំពេញ ហើយ លោក ស្នើអោយមន្ត្រីយើងទាំងអស់ត្រូវយល់ដឹងអោយបានច្បាស់ពីព្រះរាជក្រឹត្យ អនុក្រឹត្យ លិខិតបទដ្ឋាននានា ដើម្បីយកទៅបំពេញការងារអោយបានល្អ ជៀសវាង មានបញ្ហាប្រឈមជាមួយច្បាប់។
កាលពីព្រឹកថ្ងៃទី២៧ កញ្ញា ២០១៨ នៅរដ្ឋបាលសាលរាជធានីភ្នំពេញបើកអង្គ សិក្ខាសាលាផ្សព្វផ្សាយខ្លឹមសារអនុក្រឹត្យលេខ២៤០អនក្រ .បក សេចក្តីណែនាំលេខ៧៨៨ មស .សណន សេចក្តីណែនាំលេខ៧៨៩ មស .សណន និងលិខិតបទដ្ឋានគតិយុត្តពាក់ព័ន្ធជូនមន្ត្រីរាជការស៊ីវិល ។
លោកកើត ឆែ បានមានប្រសាសន៍ថា មន្ត្រីរដ្ឋបាលសាធារណៈនិងសេវាសាធារណៈ មានភាពផ្សារភ្ជាប់មិនដាច់ មានប្រសិទ្ធផលដោយផ្ទាល់ជាមួយជីវភាពរស់នៅរបស់ប្រជាពលរដ្ឋ ស្ថិរភាព ចីរភាព និងការអភិវឌ្ឍសេដ្ឋកិច្ចសង្គម។
លោកបន្តថា ក្នុងក្របខ័ណ្ឌនៃការកែទម្រង់រដ្ឋបាលសាធារណៈនេះ មានយុទ្ធសាស្ត្រសំខាន់ៗ ៣ ក្នុងនោះ ទី១ ពង្រឹងប្រសិទ្ធភាព គុណភាពនៃសេវាសាធារណៈ ទី២ ការអភិវឌ្ឍសមត្ថិភាព ការកែលម្អ ការគ្រប់គ្រងធនធានមនុស្ស និងទី៣ ការកែទម្រង់ប្រព័ន្ធបៀវត្សរ៍ និងប្រាក់ឧបត្ថម្ភផ្សេងៗ ។
ដើម្បីសម្រេចអោយបាននូវគោលដៅនេះ លោកកើត ឆែក៏បានស្នើអោយមន្ត្រីទាំងអស់ត្រូវយល់ដឹងអោយបានច្បាស់ពីព្រះរាជក្រឹត្យ អនុក្រឹត្យ លិខិតបទដ្ឋាននានា ដើម្បីយកទៅបំពេញការងារអោយបានល្អ ជៀសវាង មានបញ្ហាប្រឈមជាមួយច្បាប់។
លោកថោ សេដ្ឋាណា អនុរដ្ឋលេខាធិការនៃក្រសួងមុខងារសាធារណៈ បានមានប្រសាសន៍ថា សិក្ខាសាលាផ្សព្វផ្សាយខ្លឹមសារអនុក្រឹត្យលេខ២៤០អនក្រ .បក ស្តីពីប្រតិភូកម្មពីថ្នាក់ជាតិមកអោយរដ្ឋបាលរាជធានី នេះជាលើកទី១១ ដែលយើងបានផ្សព្វផ្សាយ ។
សិក្ខាសាលានេះ ពិតជាមានប្រយោជន៍យ៉ាងខ្លាំង ក្នុងការគ្រប់គ្រងបុគ្គលិក ការបញ្ចប់ តែងតាំងមុខងារដល់មន្ត្រី ។ លោកបានបន្តថា មន្ត្រីរាជការនៃរដ្ឋបាលរាជធានីភ្នំពេញមានចំនួន១៤.៧៤២នាក់ ។ ចំនួននេះមិនច្រើនទេ ដោយមានរហូតដល់ចំនួន១២ខណ្ឌនិងមន្ទីរចំណុះអោយរដ្ឋបាលរាជធានីជាច្រើនទៀតនោះ។ លោកបញ្ជាក់ថា សម្រាប់អភិបាលរាជធានីភ្នំពេញ លោកមានសិទ្ធិក្នុងការចាត់ចែងមន្ត្រី ចាប់ពីប្រធានមន្ទីរ ដោយលោកអាចលើកជាសំណើរ សហការជាមូយរដ្ឋមន្ត្រី ហើយការសម្រេចចុងក្រោយគឺរដ្ឋមន្ត្រីសាមី។ ចំពោះអនុប្រធានមន្ទីរវិញ ធ្វើឡើងតាមសំណើររបស់ប្រធានមន្ទីរ ដែលមានកិច្ចប្រជុំក្នុងគណៈដឹកនាំរបស់មន្ទីររបស់ខ្លួន និងលោកអភិបាលជាអ្នកសម្រេច៕ ដោយ ៖ កូឡាប
