ប្រទេសចិនធំ មនុស្សច្រើន ហេតុនេះ រឿងចម្លែកៗក៏មិនតិចដែរ ។ ខាងក្រោមគឺជារឿងកម្រមានមួយ ។
បុរសត្រកូលចាវ មានភរិយា និងកូនស្រីម្នាក់ រស់នៅខេត្តហួណាន ប្រទេសចិន ។ តាំងពីមានកូន ក្រុមគ្រួសារពិតជាមានសុភមង្គល ។ ប៉ុន្តែពេលកូនស្រីកាន់តែធំឡើងនោះ មុខមាត់វាកាន់តែអាក្រក់មិនដូចខ្លួន ហើយនិងភរិយា ។
គិតយូរៗទៅនឹកថា ប្រហែលជាភរិយាលួចមានសហាយស្មន់ ហើយក្មេងស្រីនេះពុំមែនជាកូនរបស់ខ្លួន ។
កាន់តែគិតកាន់តែលំបាកទ្រាំទ្រ ត្រកូលចាវក៏នាំភរិយានិងកូនស្រីទៅមន្ទីរពេទ្យពិនិត្យ DNA ដើម្បីបញ្ជាក់ឲ្យច្បាស់ទាំងអស់គ្នា ។ លទ្ធផលគឺនាងតូចពិតជាកូនរបស់លោកចាវ ប៉ុន្តែក្នុងអំឡុងពេលត្រួតពិនិត្យនោះ វេជ្ជបណ្ឌិតបានរកឃើញមូលហេតុដែលមុខមាត់របស់ក្មេងស្រី “អាក្រក់”បែបនេះ ។
បញ្ហាព្រោះកូនកណ្តុរនៅបំពង់ករបស់ក្មេងស្រី បានរីកធំចម្លែកមានទំហំប្រហែល ៣/៤ នៃប្រអប់មាត់ ជាហេតុនាំឲ្យធ្មេញត្រូវដុះមកខាងក្រៅនាំឲ្យផ្ទៃមុខក្លាយជា…អាក្រក់បែបនេះ ។
ក្រោយការវះកាត់ព្យាបាលផ្ទៃមុខរបស់ក្មេងស្រីកំពុងលូតលាស់ មានសម្រស់គួរឲ្យស្រឡាញ់ ។ គ្រូពេទ្យបានទូន្មានលោកចាវថា ពេលឃើញកូនមិនប្រក្រតីអ្វីមួយនោះត្រូវទៅឲ្យពេទ្យពិនិត្យ កុំចេះតែសង្ស័យផ្តេសផ្តាស ព្រោះវាអាចនាំឲ្យសុភមង្គលគ្រួសារមួយត្រូវ… “បែកខ្ទេច” តែម្តង ៕ ចន្ទ្រា
