នៅថ្ងៃទី២៧កញ្ញា អ្នកវិទ្យាសាស្ត្រើល្បីល្បាញអាមេរិក Siegfried S. Hecker បានស្វាគមន៍សំណើថ្មីៗនេះរបស់កូរ៉េខាងជើងក្នុងការបិទទ្វាររោងចក្រនុយក្លរអ៊ែរYongbyon ហើយថានេះជាជំហានមួយគួរចាប់អារម្មណ៍។
ថ្លែងនៅសេអ៊ូល អ្នកជំនាញការរូបនេះឱ្យដឹងថាលទ្ធផលលេចធ្លោក្នុងដំណើរទស្សនកិច្ចរបស់ប្រធានាធិបតី កូរ៉េខាងត្បូង Moon Jae-in ទៅកាន់កូរ៉េខាងជើងកាលពីសប្តាហ៍មុន គឺការសន្យារបស់មេដឹកនាំកូរ៉េខាងជើង Kim Jong-un ថានឹងបិទទ្វាររោងចក្រ Yongbyon ប្រសិនបើអាមេរិកមានកាយវិការតបស្នងសមរម្យនោះ។
ការវាយតម្លៃរបស់លោក Hecker គឺផ្ទុយស្រឡះនឹងមតិរបស់អ្នកជំនាញការជាច្រើនដែលរិះគន់ថារោងចក្រនុយក្លេអ៊ែរនេះវា ហួសសម័យ ហើយមានតម្លៃយុទ្ធសាស្ត្រតិចតួចប៉ុណ្ណោះ។ ប៉ុន្តែលោកHecker បានលើកឡើងថា ថ្វីត្បិតរោងចក្រនេះចាស់ក្តី តែវានៅមានសមត្ថភាពអាចបំពេញមុខងារបាន។
លោកHecker ត្រូវបានគេដឹងថា ជាអ្នកជំនាញការដែលមានបទពិសោធច្រើនក្នុងបញ្ហានុយក្លេអ៊ែរកូរ៉េខាងជើង ហើយលោកសង្កត់ធ្ងន់ថាសារសំខាន់នៃការកសាងជំនឿទុកចិត្តក្នុងដំណើរការរំសាយនុយក្លេអ៊ែរតាមលោកត្រូវចំណាយពេយ៉ាងតិចមួយទសវត្សឯណោះ។លោកក៏បានសម្តែងជំនឿចិត្តអំពីការកសាងទំនុកចិត្តចំពោះកូរ៉េខាងជើងពិសេសតាមរយៈស្រាវជ្រាវវិទ្យាសាស្ត្រ។
រោងចក្រនុយក្លេអ៊ែរYongbyon គឺជាកន្លែងដែលកូរ៉េខាងជើងផលិតគ្រាប់បែកនុយក្លេអ៊ែរ(ឬហៅថាគ្រាប់បែក H )ដែលវា មានកម្លាំងបំផ្លាញលើសពីគ្រាប់បែកបរមាណូ(គ្រាប់បែកA)ច្រើនដង។
គួររំលឹកថា ក្នុងដំណើរទស្សនកិច្ច៣ថ្ងៃរបស់ប្រធានាធិតីកូរ៉េខាងត្បូងMoon Jae-in មេដឹកនាំកូរ៉េខាងជើងKim Jong-un បានសន្យាបំផ្លាញ ចោលទាំងស្រុងទីលានសាកល្បងកាំជ្រួចអន្តរទ្វីប(ICBM)ព្រមទាំងអាចបិទទ្វាររោងចក្រនុយក្លេអ៊ែរYongbyonហើយក៏សន្យាជាថ្មីអំពីការរំសាយនុយក្លេអ៊ែរទាំងស្រុងនៅឧបទ្វីបកូរ៉េ៕
លីសា
