ខេត្តព្រះសីហនុ ៖ កម្លាំងនគរបាលនៃស្នងការដ្ឋាននគរបាលខេត្តព្រះសីហនុ បានឲ្យដឹងថា ដើម្បីបង្ការនិងកាត់បន្ថយគ្រោះថ្នាក់ចរាចរណ៍តាមផ្លូវជាតិលេខ៤ ឲ្យថយចុះចំនួន កាលពីរសៀលថ្ងៃទី២៧ ខែកញ្ញា ឆ្នាំ២០១៨ កម្លាំងការិយាល័យនគរបាលចរាចរណ៍ផ្លូវគោក ចំនួន ១២នាក់ រថយន្តស៊ីរ៉ែនចំនួន ១គ្រឿង និង រថយន្តល្បាត ចំនួន ១គ្រឿង ដឹកនាំដោយលោកវរៈសេនីយ៍ទោ សំរិទ្ធ លន់ នាយរងការិយាល័យនគរបាលចរាចរណ៍ផ្លូវគោក បានចុះល្បាត ចល័ត លើភូមិសាស្ត្រ ផ្លូវជាតិលេខ៤ ចាប់ពីក្រុងព្រះសីហនុ រហូត ដល់ ចន្លោះគីឡូម៉ែត្រ ២០៦-២០៧ ស្ថិតនៅក្នុងភូមិស្មាច់ដែង ឃុំរាម ស្រុកព្រៃនប់ ដើម្បី រឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក អប់រំ ណែនាំ ត្រួតពិនិត្យជាតិស្រវឹងលើអ្នកបើកបរ និងត្រួតពិនិត្យល្បឿនផងដែរ។
មន្ត្រីនគរបាលឲ្យដឹងថា ជាលទ្ធផល បានអប់រំណែនាំ ដល់អ្នកបើកបររថយន្តចំនួន ៤០នាក់។ ក្នុងនោះអ្នកបើកបររថយន្តធុនធំចំនួន ១៥នាក់ ដោយណែនាំកុំឲ្យបើកបរមានល្បឿនលឿន វ៉ាជែងក្នុងស្ថានភាពគ្រោះថ្នាក់ ពេលបើកបរកុំពិសារគ្រឿងស្រវឹង មិនអោយប្រើប្រាស់គ្រឿងញៀន និង បើកបរចេះអធ្យាស្រ័យឲ្យគ្នាទៅវិញទៅមក ។
សមត្ថកិច្ចនគរបាលចរាចរណ៍ផ្លូវគោកខេត្តព្រះសីហនុ បានឲ្យដឹងថា ចំពោះការត្រួតពិនិត្យរកជាតិស្រវឹង ទៅលើអ្នកបើកបររថយន្តមួយចំនួននាឱកាសនោះ គឺកម្លាំងនគរបាល រកពុំឃើញអ្នកបើកបររូបណាម្នាក់ មានទទួលទានគ្រឿងស្រវឹងពេលបើកបរនោះទេ៕ ដោយ៖ ដែន សីមា
