ខេត្តព្រះសីហនុ ៖ អ្នកឃ្លាំមើលផែនការអភិវឌ្ឍសង្គម រំពឹងថា សាលាដំបូងខេត្តព្រះសីហនុ នឹងផ្តល់យុត្តិធ៌មជូនប្រជាពលរដ្ឋមានទំនាស់ដីធ្លីចំនួន ៤នាក់ ដែលត្រូវឈ្មួញមានទ្រព្យ និងមានអំណាចប្តឹងតុលាការចាប់ដាក់ពន្ធនាគារជាង ៣ខែកន្លងមកហើយ នឹងអាចត្រូវតុលាការដោះលែងពីពន្ធនាគារ ឲ្យមានសេរីភាពវិញ ក្នុងពេលដ៏ឆាប់ខាងមុខ។
មន្ត្រីសង្គមស៊ីវិល និងប្រជាពលរដ្ឋមានទំនាស់ដីធ្លី នៅសហគមន៍អូរខ្សាច់ រស់នៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ មានជំនឿថា សាលាដំបូងខេត្តព្រះសីហនុ នឹងផ្តល់យុត្តិធម៌ ហើយទម្លាក់ចោលការចោទប្រកាន់ ព្រមទាំងដោះលែងពលរដ្ឋមានទំនាស់ដីធ្លីចំនួន៤នាក់ ដែលកំពុងជាប់ពន្ធនាគារ ប្តឹងដោយ លោកឧកញ៉ា តាន់ តាត់ និងលោក ឡុញ វណ្ណៈ អ្នកមានទ្រព្យដ៏ល្បីនៅខេត្តព្រះសីហនុ ឲ្យមានសេរីភាពវិញឆាប់ៗនេះ។
ក្តីរំពឹង របស់មន្ត្រីសង្គមស៊ីវិល និងតំណាងសហគមន៍មានទំនាស់ដីធ្ល នៅសហគមន៍អូរខ្សាច់ដូច្នេះ កើតឡើងក្រោយពេល សាលាដំបូងខេត្តព្រះសីហនុ កាលពីព្រឹកថ្ងៃទី២៧ ខែកញ្ញា ឆ្នាំ២០១៨ បានលើកយកសំណុំរឿងពលរដ្ឋមានទំនាស់ដីធ្លីចំនួន៤នាក់ ដែលកំពុងជាប់ពន្ធនាគារមកបើកសវនាការ។
ពលរដ្ឋទាំង៤នាក់នោះ រួមមាន ៖ លោកស្រី ឡុច ទូច តំណាងសហគមន៍អូរខ្សាច់ លោក ញ៉ាញ់ ជាតិ លោក មែន ខេន និងលោក កៅ ហេង ដែលត្រូវបាន លោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បញ្ជាកម្លាំងកងរាជក្រោមឱចាទចុះ ចាប់ខ្លួនបញ្ជូនទៅកាន់ សាលាដំបូងខេត្តព្រះសីហនុ ហើយត្រូវបានតុលាការខេត្តនេះ ចោទប្រកាន់ និងឃុំខ្លួនដាក់ពន្ធនាគារចោទពីបទ “ជនប្រើអំពើហឹង្សាលើអ្នកកាន់កាប់អចលនវត្ថុដោយសុចរិត” កាលពីថ្ងៃទី៧ ខែឧសភា ឆ្នាំ២០១៨។
វិវាទដីធ្លីខាងលើនេះ ប្តឹងដោយ លោកឧកញ៉ា តាន់ តាត់ និងលោក ឡុញ វណ្ណ: ដែលត្រូវបានគេស្គាល់ថា ជាអ្នកមានទ្រព្យ និងមានអំណាចដ៏សម្បើមនៅខេត្តព្រះសីហនុ។
ទាក់ទិនបញ្ហានេះ អ្នកស្រី ជាប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ ដែលតាមឃ្លាំមើលដំណើរការសវនាការកាលពីព្រឹកមិញនេះ មានជំនឿថា សាលាដំបូងនឹងផ្តល់យុត្តិធ៌មជូនប្រជាពលរដ្ឋ ៤នាក់ កំពុងជាប់ពន្ធនាគារ ដែលមានដើមបណ្តឹងឈ្មោះ តាន់ តាត់ និងឡុញ វណ្ណៈ។
អ្នកស្រី សុធារី បានគាំទ្រនីតិវិធី របស់សាលាដំបូងខេត្តព្រះសីហនុ ដែលបានផ្តល់ឱកាសដល់ជន ជាប់ ចោទទាំង ៤នាក់ បានឆ្លើយបំភ្លឺរាល់ការចោទប្រកាន់ របស់ដើមបណ្តឹង គឺលោកឧកញ៉ា តាន់ តាត់ និងលោក ឡុញ វណ្ណៈ បានទូលំទូលាយ។
អ្នកស្រី ជាប សុធារី៖«ព្រឹកមិញនេះឃើញថា ទាំងលោកចៅក្រមជំនុំជំរះ និងលោកព្រះរាជអាជ្ញាបានយកចិត្តទុកដាក់យ៉ាងខ្លាំងក្នុងការសាកសួរដេញដោល ហើយបានផ្តល់ឱកាសជនជាប់ចោទបានឆ្លើយ និងផ្តល់ឱកាសឲ្យមេធាវី ជនជាប់ចោទទាំង៤នាក់ អាចសាកសួរទៅជនជាប់ចោទ ដែលជាកូនក្តី របស់ខ្លួន ដើម្បីដោះបន្ទុក រាល់ការចោទប្រកាន់ទាំងឡាយ។ សម្រាប់ខ្ញុំដែលបានចូលរួមស្តាប់ដំណើរការ នៃសវនាការកាលពីព្រឹកមិញ យើងឃើញថា ដំណើរការសវនាការនេះ គឺមានលក្ខណៈល្អ និងមានក្តីសង្ឃឹមថា រាល់ចម្លើយ ហើយនឹងរាល់ឯកសារ ដែលជនជាប់ចោទទាំង៤នាក់ បានដាក់ជូនទៅលោកចៅក្រម និងលោកព្រះរាជអាជ្ញា លោកនឹងយកចិត្តទុកដាក់ក្នុងការស្រាវជ្រាវបន្ថែមទៀត»។
សវនាការខាងលើនេះ ក្រុមគ្រួសារ របស់លោកស្រី ឡុច ទូច និងប្រជាពលរដ្ឋសហគមន៍ ដែលមានជម្លោះដីធ្លីចំនួន ១៣សហគមន៍ផ្សេងទៀត នៅទូទាំងខេត្តព្រះសីហនុមានចំនួនប្រមាណរាប់រយនាក់ ក៏បានលើកគ្នាឡើងទៅគាំទ្រ និងតវ៉ានៅមុខសាលាដំបូងខេត្តព្រះសីហនុ ដើម្បីស្នើរសុំអោយតុលាការខេត្តនេះ ទម្លាក់ចោលការចោទប្រកាន់ដល់ អ្នកស្រី ឡុច ទូច ដែលជាតំណាងសហគមន៍អូរខ្សាច់ និងសមាជិក៣នាក់ទៀត ហើយបានទាមទារឲ្យតុលាការដោះលែងពួកគាត់ឲ្យមានសេរីភាពវិញ។
ត្រង់ចំណុចនេះ អ្នកស្រី ជាប សុធារី មន្ត្រីសមាគមអាដហុក បានកត់សម្គាល់ថា សវនាការ កាលពីព្រឹកថ្ងៃទី២៧ ខែកញ្ញា គឺទាំងលោកចៅក្រមជំនុំជំរះ និងលោកព្រះរាជអាជ្ញាបានយកចិត្តទុកដាក់យ៉ាងខ្លាំង ក្នុងការសាកសួរដេញដោល និងផ្តល់ឱកាសដល់ជនជាប់ចោទ និងមេធាវីជនជាប់ចោទឆ្លើយបំភ្លឺជុំវិញការចោទប្រកាន់ដើម្បីដោះបន្ទុក។
អ្នកស្រី ជាប សុធារី៖«តាមការអះអាង របស់លោក អ៊ូ សុផាត ដែលជាមេភូមិនៅក្នុងទីតាំងដីទំនាស់ដែលឋឹតនៅក្រោមការគ្រប់គ្រង របស់គាត់ៗបានឆ្លើយបញ្ជាក់យ៉ាងច្បាស់ថា តំបន់នេះ គឺជាតំបន់ខ្មែរក្រហមគ្រប់គ្រង សូម្បីតែរូបលោកដែលរស់នៅទីនោះ ក៏រូបលោកមិនដែលហ៊ានចូលទៅកាន់ដំបន់នោះផងទេ។ ហើយលោកបានបញ្ជាក់ដែរថា ម្ចាស់ប័ណ្ណភោគីទាំងអស់ ដែលលក់ និងផ្ទេរសិទ្ធិទៅឲ្យឈ្មោះ ឡុញ វណ្ណៈ និង ឈ្មោះ តាន់ តាត់ ហ្នឹង គឺលោកមិនដែលស្គាល់នោះទេ»។
យ៉ាងនេះក្តី សវនាការរបស់សាលាដំបូងខេត្តព្រះសីហនុ កាលពីព្រឹកមិញនេះ មិនទាន់បានបញ្ចប់ទេ ដោយត្រូវលើកពេល បន្តបើកសវនាការ នៅថ្ងៃទី៣ ខែតុលា ឆ្នាំ២០១៨ជាបន្តទៀត។
ចំណែក លោក ញ៉ឹល ភាព ជាតំណាងសហគមន៍ប្រជាពលរដ្ឋមានទំនាស់ដីធ្លី ទូទាំងខេត្តព្រះសីហនុ បានរិះគន់នីតិវិធី របស់សាលាដំបូងខេត្តព្រះសីហនុ ដែលបានឃុំខ្លួនពលរដ្ឋមានទំនាស់ដីធ្លីចំនួន ៤នាក់ ដាក់ពន្ធនាគារ។
លោក ញ៉ឹល ភាព៖ «ការឃុំខ្លួនទៅលើប្រជាពលរដ្ឋសហគមន៍អូរខ្សាច់ ជាពិសេសយាយ ឡុច ទូចនេះ គឺមិនបានធ្វើទៅតាមនីតិវិធីច្បាប់ទេ។ យើងឃើញថា បើផ្អែកទៅតាមឯកសារនៃផ្លូវច្បាប់ គឺលោក តាន់ តាត់ និងឡុញ វណ្ណៈ ដែលជាដើមបណ្តឹងដែលប្តឹងចោទលោកស្រី ឡុច ទូច និងពលរដ្ឋប្រាំប្រាំមួយអ្នកទៀត ពីបទប្រើប្រើហឹង្សាទៅលើអ្នកកាន់កាប់អចលនវត្ថុ គឺមិនត្រឹមត្រូវទេ»។
កាលពីដើមខែឧសភា ឆ្នាំ២០១៨ មេបញ្ជាការកងរាជអាវុធហត្ថខេត្តព្រះសីហនុ គឺ លោក ហេង ប៊ុនទី បានបញ្ជាឲ្យកម្លាំងក្រោមឱវាទ របស់ខ្លួនចុះចាប់ពលរដ្ឋខាងលើ ទៅតាមពាក្យបណ្តឹង របស់លោកឧកញ៉ា តាន់ តាត់ ខណៈប្រជាពលរដ្ឋទាំងនោះ កំពុងត្រួសត្រាយសំអាតស្មៅ និងកាប់ព្រៃនៅលើដីមានជម្លោះនោះ។
ក្រោយមកតុលាការខេត្តព្រះសីហនុ ក៏បានចោទប្រកាន់ពលរដ្ឋចំនួន ៤នាក់ពីបទ «ប្រើហិង្សាលើអ្នកកាន់កាប់អចលនវត្ថុដោយសុចរិត» តាមដើមបណ្តឹងឈ្មោះ តាន់ តាត់ មានងារជាឧកញ៉ា និងឈ្មោះ ឡុញ វណ្ណៈ ដែលគេស្គាល់ថា ជាអ្នកមានទ្រព្យធន និងជាឈ្មួញរកស៊ីដីធ្លីដ៏ល្បីនៅខេត្តព្រះសីហនុ៕ ដោយ៖ ដែន សីមា
