ខេត្តកំពង់ស្ពឺ ៖ តើអ្នកចូលចិត្តហូបសាច់ក្រកដែរឬទេ ? សិប្បកម្មផលិតសំបកសាច់ក្រកគ្មានស្តង់ដាមួយកន្លែងនៅភូមិថ្មីពីងពង់ ឃុំដំណាក់រាំង ស្រុកឧដុង្គ ខេត្តកំពង់ស្ពឺ ត្រូវបានបង្ក្រាប ដោយក្រុមការងារ គណៈកម្មាធិការប្រយុទ្ទប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់សុខភាព និង សុវត្ថិភាពសង្គម សហការណ៍ជាមួយស្នងការដ្ឋាននគរបាលខេត្តកំពង់ស្ពឺ នារសៀលថ្ងៃទី២៩ ខែវិច្ឆិកា ឆ្នាំ២០១៧ ។
កងកម្លាំងប្រតិបត្តិការពិសេស បានឱ្យដឹងថា វត្ថុធាតុដើមនាំមកពីស្រុកចិន និងរាជធានីភ្នំពេញ រួមមាន : ពោះវៀនសត្វ ជ្រូក ជៀម អាស៊ីតលឿង ម្ស៉ៅសបូរ៉ាក់ ។ ក្រោយការផលិតបានពួកគេវិចខ្ចប់ចែកចាយទៅតាមបណ្ដារាជធានីខេត្ត ដោយក្លែងថាផលិតនៅប្រទេសចិន ។
ម្ចាស់សិប្បកម្មឈ្មោះ វីង ហ៊ុយ រស់នៅរាជធានីភ្នំពេញ ក្រុមការងារកំពុងស្វែងរកអោយមកទទួលខុសត្រូវ ។
ទីតាំង ផលិតស្រោមញាត់សាច់ក្រក ដែលធ្វើអំពីពោះវៀនសត្វគ្រប់ប្រភេទ ប្រើសារធាតុគីមីចំនួនរាប់សិបតោនគ្មានគុណភាព និងស្តង់ដារប្រឈមប៉ះពាល់ដល់សុខភាពប្រជាពលរដ្ឋជាអ្នកប្រើប្រាស់ដ៏ធ្ងន់ធ្ងរ។
ប្រតិបត្តិការខាងលើនេះ ដឹកនាំដោយលោកឧត្តមសេនីយ៍ត្រីទូច យុទ្ធា និងលោកឧត្តមសេនីយ៍ត្រីទូច គង្គា ប្រធាន-អនុប្រធានក្រុមប្រតិបត្តិការពិសេស លេខាធិការដ្ឋាននៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ក្រោមការសម្របសម្រួលពីតំណាងអយ្យការសាលាដំបូងខេត្តកំពង់ស្ពឺ លោកសឿ ឡងឌី និងមានការចូលរួមសហការ ពីកម្លាំងជំនាញកាំកុងត្រូល តំណាងខាងក្រសួងឧស្សាហកម្ម និងសិប្បកម្ម ខាងកម្លាំងនគរបាលខេត្តកំពង់ស្ពឺ ។
ទីតាំងខាងលើនេះ បានរក្សាទុកនូវពោះវៀនសត្វគ្រប់ប្រភេទសម្រាប់យកមកផលិតធ្វើជាស្រោមញាត់សាច់ក្រក ដើម្បីចែកចាយលក់នៅតាមទីផ្សារ ក្នុងនោះ មានពោះវៀនសត្វគ្រប់ប្រភេទរាប់សិបតោន ដែលប្រើសារជាតិគីមី អាចប្រឈមទៅនឹងបញ្ហាប៉ះពាល់សុខភាពរបស់ប្រជាពលរដ្ឋ ជាអ្នកបរិភោគយ៉ាងធ្ងន់ធ្ងរ ៕ ដោយ៖បញ្ញាស័ក្តិ
